युनाइटेड अरब इमिरेट्स (यूएई)मा एउटै कम्पनीमा कार्यरत २५ सयभन्दा बढी नेपाली कामदारले एकैपटक रोजगारी गुमाएका छन् । कोरोना महामारीका कारण उत्पन्न संकटका कारण यूएईको आउटसोर्सिङ कम्पनी ट्रान्सगार्ड ग्रुपमार्फत काम गर्दै आएका २५ सय नेपालीले रोजगारी गुमाएका हुन् ।

ट्रान्सगार्डमार्फत करिब १२ हजार नेपालीले यूएईका विभिन्न कम्पनीमा कार्यरत छन् । करार अवधि बाँकी छँदै रोजगारी गुमाउनुपरेपछि नेपाली युवा समस्यामा परेका छन् । उनीहरूले आफ्नो समस्याबारे यूएईस्थित नेपाली दूतावासमा जानकारी गराएको बताएका छन् ।

यसबारे दूतावासले परराष्ट्र मन्त्रालयमा जानकारी गराइसकेको छ । कम्पनीले आफ्नै खर्चमा श्रमिकलाई नेपाल पठाउन प्रस्ताव गरेको छ । त्यसका लागि नेपाल सरकारले स्वीकृति दिनुपर्नेछ । यूएईमा हाल करिब २५ हजार नेपालीले रोजगारी गुमाएपछि ४ हजार मात्रै फर्किएको दूतावासले जनाएको छ ।

प्रकाशित समय १२:५४ बजे