देशभकार ४९ जना गरिब तथा जेहेन्दार विद्यार्थीलाई प्रदान गर्ने घोषणा गरेको छात्रवृत्तिबारे जानकारी गराउन कम्प्युटर एसोसिएसन नेपाल (क्यान) महासंघ कर्णाली पुगेको छ । लर्ड बुद्ध एजुकेसन फाउन्डेसनसँगको सहकार्यमा ‘क्यान नेसनल आईसीटी स्कलरसिप– २०७५ मा ग्रामीण क्षेत्रका विद्यार्थीको सहभागिता बढाउने योजनाअनुसार क्यान कर्णाली पुगेको हो ।

क्यान महासंघ कर्णाली प्रदेशको आयोजना र क्यान महासंघ जिल्लाको समन्वयमा कार्यक्रम गरी आइतबार छात्रवृत्तिबारे जानकारी दिइएको छ । पत्रकार सम्मेलनमा क्यान महासंघका वरिष्ठ उपाध्यक्ष नवराज कुँवरले सकेसम्म ग्रामीण क्षेत्रका विद्यार्थीलाई छात्रवृत्तिमा समेटिने बताए ।

नेपालका सातै प्रदेशका विद्यार्थीले समान अवसर प्राप्त गर्नेगरी प्रत्येक प्रदेशबाट एक–एक जना छात्रालाई पूर्ण छात्रवृत्ति र ६ जनालाई आंशिक छात्रवृत्ति वितरण गर्न लागिएको छ । सातैवटा प्रदेशका ४९ विद्यार्थीले एक करोड ८३ लाख ३६ हजार पाँचसय रुपैयाँबराबरको छात्रवृत्ति प्राप्त गर्नेछन् ।

छात्रवृत्ति प्राप्त गर्ने विद्यार्थीले मलेसियाको एसिया प्यासिफिक युनिर्भसिटी अफ टेक्नोलोजी एन्ड इन्नोभेसनबाट सम्बन्धनप्राप्त लर्डबुद्ध एजुकेसन फाउन्डेसनमा स्नातक तहअन्तर्गत बीएस्सी आईटी अध्ययन गर्न पाउनेछन् । छात्रवृत्तिका लागि योग्यता पुगेका विद्यार्थीले साउन ९ गतेभित्र क्यान महासंघको वेबसाइटबाट आवेदन दिन सक्नेछन् ।

प्रकाशित समय १७:५४ बजे