सरकारले चीनलाई उपहार दिने दुई जोडी गैंडामध्ये एक जोडी यही असार २८ गते चीन पठाइने भएको छ । चिनिया साइटिस टोली गैंडाको अवस्था बुझ्न विहिबार चितवन आइपुगेको छ । सो टोलीले राष्ट्रिय निकुञ्ज विभागका अधिकारीहरुसँग छलफल भएको थियो ।

राष्ट्रिय निकुञ्ज विभागका उपमहानिर्देशक गोपाल भट्टराईका अनुसार जुलाई १२ अर्थात् असार २८ गते गैंडा पठाउने तयारी गरिएको छ । गैंडा पठाउनका लागि खोर निर्माण भइसकेको छ । खोरको बाहिरी भागमा फलाम र भित्री भागमा काठको फल्याक राखिएको छ । चिनियाँ टोलीले काठलाई सिजनिङ गर्नुपर्ने जनाएपछि त्यसको तयारी गरिएको छ । गैंडा लैजानका लागि तीन मिटर लम्बाइ, एक दशमलब नौ मिटर उचाइ र एक दशमलब ४५ मिटर चौडाइका चारवटा खोर बनाइएका छन् । नट कसिएको हुँदा खोर भत्काएर काठलाई सिजनिङ गर्न सकिनेछ ।

चीनको साइटिस म्यानेजमेन्ट अथोरेटीका सहायक निर्देशक लिउ टिवाङ्को नेतृत्वको टोली चितवन आइपुगेको हो । टोलीले सौराहामा पिट बुमामा राखिएको गैंडाको स्वास्थ्य अवस्थाका बारेमा पनि जानकारी लिँदैछ ।

चितवन राष्ट्रिय निकुञ्जका प्रमुख संरक्षण अधिकृत बेदकुमार ढकालका अनुसार टोलीले लैजाने तयारीमा राखिएको गैंडाको सम्पूर्ण अवस्थाका बारेमा जानकारी लिई निकुञ्ज र राष्ट्रिय प्रकृति संरक्षण कोषका प्रतिनीधिसँग छलफल गर्ने कार्यक्रम रहेको छ । चीन लैजान बुमामा राखिएका गैंडालाई कसरी प्रभावकारी ढङ्गबाट लैजान सकिन्छ भन्ने बारेमा पनि छलफल गरिँदैछ ।

गैंडा प्रधानमन्त्री केपी शर्मा ओलीको चीन भ्रमणको सयममा पठाउने तयारी गरिएको भए पनि चिनियाँ टोलीको तयारी अभावमा पठाउन सकिएको थिएन । अर्काे एक जोडीको नामाकरण गरिएको छैन । नामाकरण गरिएका गैंडालाई असार २८ गते र अर्काे एक जोडी गैंडालाई साउनको पहिलो साता चीन पठाउने तयारी गरिएको हो ।

दुई वर्षअघि चीन भ्रमणका क्रममा तत्कालीन प्रधानमन्त्री केपी शर्मा ओलीले चीन सरकारलाई दुई जोडी गैंडा उपहार दिने वचन दिएका थिए । सोही अनुरुप गैंडा पठाउन लागिएको हो ।

(रासस)

प्रकाशित समय १४:३१ बजे