अछामको बयालपाटा अस्पतालका एक जना कर्मचारीले आफ्नै शरीरमा पेट्रोल छर्केर आगो लगाएका छन् । अस्पतालको गेटअगाडि सोमबार बिहान साफेँबगर नगरपालिका- ६ का सिद्धार्थ आउजीले आफ्नै शरीरमा आगो लगाएका हुन् ।

आगोले जलेर गम्भीर घाइते भएका उनलाई थप उपचारको लागि हेलिकप्टरमार्फत नेपालगन्ज लैजाने तयारी भएको प्रमुख जिल्ला अधिकारी पुण्यविक्रम पौडेलले बताए । अस्पतालले कामबाट हटाएका उनी शाैचालय सफाइ गर्ने जिम्मेवारीमा थिए । उनको एक छोरा र एक छोरी रहेका छन् ।

आर्थिक संकट परेको भन्दै उनीलगायत ३३ जना कर्मचारीलाई अस्पतालले दुई महिनाअघि नै  हटाएको पत्र दिएको थियो । त्यसयता उनी तनावमा रहेको हटाइएका अर्का कर्मचारी विशाल पण्डितले बताए । ‘चौकीदारको काम गर्थें । सिद्धार्थ सरसफाईको काममा थिए । हाम्रो पुरानो नियुक्ति सकिन अझै दुई महिना बाँकी थियो,’ उनले भने ।

आफूहरू काममा जाँदा अस्पताल प्रशासनले प्रहरी लगाएर गेटबाहिर निकालेको पण्डितको भनाइ छ । ‘तिमीहरूलाई हटाइसकेको हो, फेरि किन अस्पताल आयौ ?’ भन्दै हाकिमहरुले थर्काएको उनले सुनाए । महामारीकै समयमा परिवारको रोजीरोटी चल्ने माध्यम नै बन्द भएपछि निम्नस्तरका अन्य धेरै कर्मचारी तनावमा रहेको पण्डितको भनाइ छ ।

अस्पतालले भने आर्थिक संकटकै कारण कार्यसम्पादन, अनुशासन सबै हेरेर कर्मचारी कटाैती गरिएको जनाएको छ ।

प्रकाशित समय १३:४९ बजे