थोरै मेहनतमा धेरै उत्पादन लिन सकिने भएपछि कञ्चनपुरस्थित बेलौरीका किसान छरुवा धानखेती प्रविधि अपनाउन थालेका छन् । समयमै वर्षा नहुँदा धान रोपाँई गर्न ढिलो भई उत्पादनमा ह्रास आउने समस्याबाट छुटकारा पाउन किसानले छरुवा धानखेती प्रविधिलाई अपनाएका हुन् ।

डेढ बिघा खेतमा चार वर्षदेखि छरुवा विधिबाट धानखेती गर्दै आएका बेलौरी नगरपालिका–६ का खडक चौधरी रोप्ने विधिभन्दा छरुवा धानखेती प्रविधिबाट बढी उत्पादन लिन सकिने बताउँछन् । बेर्ना जोगाउन धौ–धौ पर्ने तथा मजदूर नपाउँदा रोपाइँ गर्न ढिलो हुँदा चाहेजस्तो उत्पादन लिन नसकिने उनले बताए ।

खेतमा चिस्यान कायम गर्न एकपटक सिँचाइ गरी दुईपटक खेतलाई जोतेर सिडड्रिलको सहायताले एकैसाथ मल र बीउ छरेर खेती गर्दा लागत खर्च कम लाग्ने र उत्पादनमा वृद्धि हुने चौधरीको भनाइ छ । जिरो टिलेज प्रविधिमा आधारित भई छरुवा धान प्रविधि अपनाउँदा झारपातको समस्या देखिन थालेपछि दुईपटक जोतेर किसानले छरुवा धान विधिलाई अपनाउन थालेका हुन् । ‘छरुवा प्रविधि अपनाई खेती गर्दा खर्च कम आउने गरेको छ’ उनले भने ।

छरुवा विधिमा बढी उत्पादन दिने बिआर ११३, राधा ४ र सुक्खा धानको खेती किसानले गर्दै आएका छन् । कृषि विकास शाखाका प्राविधिक हरिश सेटीका अनुसार बीउ, मल र विषादी अनुदानमा उपलब्ध गराइदै आएको छ ।

अनुदान पाएपछि किसान उत्साहीत

लालझाडी गाउँपालिका कार्यालयले व्यावसायिक खेती गर्न आधुनिक कृषि उपकरण र अनुदान उपलब्ध गराएपछि किसान उत्साहित बनेका छन् । उखु, बगरखेती र व्यावसायिक तरकारी खेती गर्न उनीहरु उत्साहित देखिएका हुन् ।

लालझाडी गाउँपालिका– ३ का रामप्रसाद चौधरीले अनुदान पाएपछि दोदा नदीको डेढ बिघा जग्गामा लौका, फर्सी, काँक्रा, तरभुजालगातका तरकारी रोपेर तीन महिनामा दुई लाख ५० हजार आम्दानी गर्न सफल भए । कृषि शाखाले बगरमा व्यावसायिक तरकारी खेती गर्ने २० किसानलाई तालिमसँगै एक लाख अनुदान उपलब्ध गराएको थियो ।

लालझाडी गाउँपालिका– ६ की गौरीदेवी चौधरीले पाँच कट्ठा जग्गामा तरकारीखेती गरी एक लाख ६० हजार आम्दानी गरिन् । अनुदान पाएपछि उनले बाह्रैमास तरकारी फलाउन थालेकी छिन् । गाउँपालिकाको कृषि शाखाका प्रमुख एकराज वलीका अनुसार कार्यालयले रु ५० लाख ७१ हजार परिचालन गरेको छ ।

(रासस)

प्रकाशित समय १५:५९ बजे