नेपाली युवा बलर सन्दीप लामिछाने सन् २०१९ मा सर्वाधिक विकेट लिने स्पिनर बनेका छन् । सोमबार रातिको भएको इन्डियन प्रिमियर लिगमा किंग्स इलाभेन पञ्जाबविरूद्ध चार ओभरमा २७ रन खर्चेर दुई विकेट थपेसँगै सन्दीपले सर्वाधिक विकेट लिने खेलाडीको सूचीमा अग्रता लिएका हुन् ।

अन्तर्राष्ट्रिय क्रिकेट काउन्सिल (आइसिसी)का अनुसार सन् २०१९ को जनवरीदेखि अप्रिल १ सम्म सन्दीपले २७ विकेट लिएका छन् । सन्दीपले पाकिस्तानका पूर्वकप्तान साहिद अफ्रिदी, अफ्गानिस्तानका रासिद खान र बंगलादेशका सकिब अल हसनलाई पछि पारेका छन् । सन् २०१९ मा अफ्रिदीले २६, रासिदले २५ र सकिबले २४ विकेट लिएका छन् ।

सन् २०१९ को जनवरीयता सन्दीपले बंगलादेश प्रिमियर लिगमा सिल्हेट सिक्सर्सबाट खेल्दै चार विकेट र यूएईसँगको तीन टि–२० सिरिजमा पाँच विकेट लिन सफल भएका थिए । यूएईसँगको सिरिजपछि पुनः अस्ट्रेलियाको बिग ब्यास लिग खेलेका उनले चार विकेट लिएका थिए । त्यसैगरी, पाकिस्तान सुपर लिगमा सन्दीपले ११ विकेट लिएका थिए ।

प्रकाशित समय १४:३२ बजे