नेपाल आदिवासी जनजाती पत्रकार महासंघ (फोनिज) रुपन्देहीले स्वर्गीय पत्रकार देव बहादुर पाटामगरको स्मृतिमा रुपन्देहीमा क्रियाशिल पत्रकारहरुका बीचमा मैत्रिपूर्ण डबल ब्याट्मिन्टन प्रतियोगिता सम्पन्न गरेको छ ।

मंगलबार बुटवलमा भएको प्रतियोगिताको उपाधी आयोजकको तर्फबाट कमल थापा र सुन्दर गुरुङको जोडीले हात पार्न सफल भयो । आयोजककै मिलन गाहा र सुन्दर तरामुको जोडीलाई हराउँदै गुरुङको जोडी विजेता बन्न सफल रह्यो ।

विजेता टिमले मेडल, प्रमाणपत्र र पाँच हजार पुरस्कार प्राप्त गरे । उपविजेतामा चित्त बुझाएका मिलन र सुन्दरको जोडीले तीन हजार नगद सहित, मेडल र प्रमाण पत्र प्राप्त गरे ।

त्यसैगरी सेमिफाइनलमा पुग्न सफल प्रेस युनियनका तर्फबाट यमलाल भूषाल र विश्वास ढकालको जोडी र कृषि पत्रकार समाजका तर्फबाट दिनेश कुमार श्रेष्ठ र घनश्याम गौतमको जोडीले मेडल, प्रमाणपत्र र नगद पुरस्कार प्राप्त गरे ।

विजयी खेलाडिहरुलाई जिल्ला खेलकुद विकास समिति, रुपन्देहीका अध्यक्ष योग बहादुर गुरुङले पुरस्कार प्रदान गर्दै पत्रकार जगतले खेलकुदलाई गरेको माया र प्रवर्रद्धनप्रति खुशी व्यक्त गरे ।

फोनिज रुपन्देहीका संस्थापक अध्यक्ष स्वर्गीय पत्रकार पाटामगरको स्मृतिमा बुटवल आयोजित प्रतियोगितामा १० टिमको सहभागिता रहेको फोनिज रुपन्देहीका अध्यक्ष सनु थापाले जानकारी दिए ।

बुटवलबाट प्रकाशित राज्यसत्ता साप्ताहिकका सम्पादक रहेका पत्रकार पाटामगरको २०६५ साल फागुन १४ गते बुटवल लखनचोक चौराहमा ट्रकले ठक्कर दिँदा घटनास्थलमै मृत्यु भएको थियो । फोनिज रुपन्देहीले हरेक वर्ष उनको स्मृतिमा रचनात्मक कार्यक्रम गर्दै आइरहेको छ ।

पत्रकार पाटाको योगदान स्मरण गर्दै स्व.देव बहादुर पाटामगर स्मृति पत्रकारिता पुरस्कारको समेत स्थापना गरिएको छ ।

प्रकाशित समय १८:४५ बजे