संघीय मामिला तथा सामान्य प्रशासनमन्त्री लालबाबु पण्डितले पृथकतावादी अभियान चलाइरहेका डा. सिके (चन्द्रकान्ता) राउतसँग सरकारले गरेको ११ बुँदे सहमति मुलुकको हितमा भएको दावी गरेका छन् ।

बिहीबार जनकपुरमा पेस चौतारी र प्रेस सेन्टर नेपालले संयुक्त रूपमा आयोजना गरेको कार्यक्रममा मन्त्री पण्डितले ११ बुँदे सहमति मधेस र देशको हितमा भएको दावी गरेका हुन् ।

राउतसँग भएको सहमतिपश्चात मधेसमा अब कुनै किसिमको राष्ट्र विखण्डनको मुद्दा नलाग्नेमा ढुक्क हुन आग्रह गरे । मुलुकमा संविधानविपरितका गतिविधि अन्त्य हुने दावी गर्दै उनले समृद्धि र विकासतर्फ अग्रसर भएको उल्लेख गरे ।

‘११ बुँदे सहमतिपछि मधेसमा अब राष्ट्रिय विखण्डन, अखण्डतामा आँच आउने तथा संविधानविपरीत मुद्दाको अन्त्य भएको छ,’ प्रेस चौतारी र प्रेस सेन्टरले बिहीबार संयुक्त रूपमा आयोजना गरेको कार्यक्रममा मन्त्रि पण्डितले भने, ‘देश समृद्धि तथा विकासतर्फ अग्रसर हुनेछ ।’

मन्त्री पण्डितले विप्लव समूहमाथि सरकारले लगाएको प्रतिबन्धको बचाउ गरे । विप्लव समूहसँग वार्ताको ढोका खुला राखेको जानकरी दिँदै मन्त्री पण्डितले अराजक गतिविधि भने सैह्य नहुने उल्लेख गरे । विप्लव समूहलाई हिंसात्मक गतिविधि त्यागेर शान्तिपूर्ण वार्तामा आउन आग्रह गरे ।

प्रकाशित समय १४:३७ बजे