पोखरा क्षेत्रीय अन्तर्राट्रिय विमानस्थलको हवाई मार्गमा पर्ने रिठ्ठेपानीको डाँडा कटान सुरु भएको छ । राष्ट्रिय गौरवको आयोजनालाई सफल पार्न स्थानीयबासीले आफैं डोजर लगाएर डाँडा कटान कार्य सुरु गरेका हुन् ।

२२ जना जग्गाधनीको संयुक्त बैठकले पोखराको विकासका लागि रिठ्ठेपानीको डाँडा कटानमा सहयोग गर्ने निर्णय गरेको जग्गाधनी गोविन्द तिमिल्सिनाले बताए । पोखरा महानगरबाट १० लाख ५० हजार घनमिटर माटो निकाल्ने अनुमति लिएको उनले जानकारी दिए । महानगरलाई हाल ५० हजार घनमिटरको अग्रिम रोयल्टीबापतको रकम ३७ लाख ८० हजार रुपैयाँ बुझाएको उनले बताए ।

माटो निकाल्दामात्र महानगरलाई जग्गाधनीहरुले रोयल्टीबापत करिब ७ करोड बुझाउनेछन् । अर्का जग्गाधनी ठाकुर बरालका अनुसार हाल पहिलो चरणमा माटो कटानका लागि वेस बनाउन रिठ्ठेपानी डाँडाको बामिया पाखाबाट एउटा स्क्याभेटर प्रयोग गरिएको छ । स्थानीयको करिब ९० रोपनी जग्गा कटान क्षेत्रभित्र पर्छ । राष्ट्रिय गौरवको आयोजनालाई सफल पार्न डाँडा कटानमा करिब २० करोड खर्चिन आफूहरु तयार भएको उनले बताए । डाँडाबाट निस्केको ढुंगामाटो बिक्रीबाट केही रकम जुट्ने बरालको विश्वास छ ।

तिमिल्सिना, बरालसहित सुदिप गिरी, सुरेन्द्र श्रेष्ठ, मानव धर्म सेवा समितिलगायतको जग्गा रिठ्ठेपानी डाँडामा पर्छ । पहिलो चरणमा कम्तीमा ८–१० रोपनी क्षेत्रफल मैदानको रुपमा वेस बनाएर निर्माण सामग्री राख्नेदेखि अस्थायी रुपमा मजदुरसहितको व्यवस्थापन सोही क्षेत्रमा गरिने जग्गाधनी बरालले जानकारी दिए ।

पोखरा विमानस्थलको निर्माण कार्य तीव्र गतिले अघि बढिरहेका बेला हवाईमार्गमा पर्ने रिठ्ठेपानीको डाँडा काट्नुको विकल्प नभएको पोखरा क्षेत्रीय अन्तर्राष्ट्रिय विमानस्थल निर्माण आयोजनका प्रमुख विनेश मुनाकर्मीले बताए । विमान उडानमा असर गर्ने भएकाले उक्त डाँडा कटान गर्न विज्ञ टोलीले सुझाव दिएको थियो । पहिलो चरणमा ३० मिटर भाग कटान गर्न स्थानीयलाई अनुमति दिएको उनले जानकारी दिए । ‘स्थानीय जग्गाधनीले उक्त डाँडा आफैं कटान गर्ने र त्यहाँबाट निस्किने ढुंगामाटो पनि आफैं व्यवस्थापन गर्नेछन्,’ उनले भने । रिठ्ठेपानी डाँडामा १२ वटा थुम्का छन् ।

रिठ्ठेपानीको डाँडामा डेढ सय रोपनी सार्वजनिक वनजंगल कटान गर्नुपर्ने देखिए पनि त्यसको वास्तविक लगत निकालेसँगै विभागबाट अनुमति लिएर कसरी कटान गर्ने भन्ने विषयमा प्रक्रिया अघि बढेको बताइएको छ । विमानस्थलको हालसम्म करिब ४२ प्रतिशत निर्माण कार्य सम्पन्न भएको आयोजना प्रमुख मुनाकर्मीले बताए । रनवे, ट्याक्सी वे लगायतका भौतिक संरचना तथा टर्मिनल भवन फाउन्डेसनको काम सकिएको छ । अब स्टिल स्ट्याक्चरको काम बाँकी रहेको उनले जानकारी दिए । ‘एक महिनामा स्टिलका सामग्री पोखरा आउनेछन्,’ उनले भने ।

प्रकाशित समय ०७:१८ बजे