डुइङ बिजनेस इन्डेक्समा नेपाल गत वर्षभन्दा १६ अंकले सुधार गर्दै ९४औं स्थानमा उक्लिकएको छ । विश्व बैंकले बिहीबार सार्वजनिक गरेको डुइङ बिजनेस इन्डेक्सअनुसार नेपाल गत वर्षको ११०औं स्थानबाट ९४औं स्थानमा आइपुगेको हो । विश्व बैंकले सन् २०१८ को मेदेखि सन् २०१९ मे महिनासम्मको अध्ययनका आधारमा यो इन्डेक्स सार्वजनिक गरेको जनाएको छ ।

नेपालले निर्माणअघिका प्रक्रियालाई सहज बनाएको, भवन निर्माण इजाजतका शुल्क घटाएको तथा अनलाइनमार्फत प्रक्रियाहरुलाई सुधार गरेको विश्व बैंकले जनाएको छ । विश्व बैंकका अनुसार नेपालले वीरगन्जमा भारतसँग एकीकृत भन्सार चेक पोस्ट सुरु गरेका कारण निर्यात-आयात व्यापारमा लाग्ने समय र लागतसमेत न्यून हुन पुगेको छ । त्यस्तै, नेपालले व्यापार सम्झौताहरु सहज बनाएको तथा कर्जा प्रणाली र त्यसबारे बृहत सूचना दिने संयन्त्र र पहुँच पनि नेपालले स्थापित गरेको पनि अध्ययनमा उल्लेख छ ।

विश्व बैंकका अनुसार चीन, भारत, पाकिस्तान, साउदी अरब, जोर्डन, टोगो, बहराइन, ताजकिस्तान, कुवेत, नाइजेरियालगायतका देश सर्वाधिक सुधार गर्ने २० देशको सूचीमा परेका छन् । भारत १४ अंक सुधार गर्दै इन्डेक्सको ६३औं स्थानमा उक्लिएको छ ।

दक्षिण एसियाली देशमध्ये भारत सबैभन्दा अग्र स्थानमा छ भने दोस्रो स्थानमा भुटान छ । नेपाल तेस्रो स्थानमा छ । चौथो स्थानमा श्रीलंका छ । दक्षिण एसियाको इन्डेक्समा सबैभन्दा तल १७३औं स्थानमा अफगानिस्तान छ ।

सूचीको पहिलो नम्बर न्युजिल्यान्ड, दोस्रोमा सिंगापुर, तेस्रोमा हङकङ, चौथोमा डेनमार्क, पाँचौंमा दक्षिण कोरिया, छैटौंमा अमेरिका, सातौंमा जर्जिया, आठौंमा बेलायत, नवौंमा नर्वे र दसौंमा स्विडेन छन् । सूचीकाको पुछारमा १९०औं नम्बरमा सोमालिया छ ।

डुइङ बिजनेस इन्डेक्स विश्वका १९० देशको समग्र अध्ययनमा आधारित रहेको विश्व बैंकले जनाएको छ । यसमा प्राप्त अंकका आधारमा कुनै पनि देशको अर्थतन्त्रमा व्यावसायिक वातावरण मापन गरिन्छ ।

प्रकाशित समय १२:१९ बजे