नेपालमा डिजिटल पत्रकारितामा केही फरक अभ्यासको अनुशरण गर्ने उद्देश्यका साथ आरम्भ गरिएको यस न्युज कारोबार डिजिटल पत्रकारिताले आफ्नो दोस्रो वर्ष पूरा गरेको छ । नेपालमा समग्र पत्रकारिता नै संक्रमणकालीन अवधिमा अगाडि बढिरहेको अहिलेको परिवेशमा अनलाइन पत्रकारितालाई अगाडि बढाउनका लागि झनै चुनौतीपूर्ण छ । यद्यपि, हामीलाई के लाग्छ भने अहिलेको समय भनेको डिजिटल पत्रकारिताकै युग हो । हरेक नागरिककोे सूचना तथा सञ्चार प्रविधिमा पहुँच बढेको र सूचनाको पहुँचमा समेत वृद्धि भएको अहिलेको परिवेशमा डिजिटल पत्रकारितामा सम्भावना र अवसरहरू दुवै छन् ।

अझै पनि सही अर्थमा नागरिकका अभिरुचिका सूचना र समाचारहरू नेपाली पत्रकारिता जगतले उठाउनै सकेको छैन । जनजीविकासँग जोडिएका थुप्रै गहन विषय वस्तुहरूलाई छाडेर राजनीतिका पछाडि आमसञ्चार माध्यमहरू लागि नै रहेका छन् । यो अवस्थालाई सानो प्रयासले भए पनि बदलिन सकिन्छ भन्ने न्यूज कारोबारको विश्वास रहेको छ । विश्वसनीय समाचार पस्कनु पर्ने गहन दायित्व त छँदैछ, त्यसबाहेक राज्यका नीतिनिर्माण तहमा आमनागरिकसँग जोडिएका विषय वस्तुको ध्यानाकर्षण गराउँदै परिवर्तनका पहल गर्नुपर्ने अर्को ठूलो दायित्व पनि छ ।

न्युज कारोबार डिजिटल पत्रिकाको यस तेस्रो वार्षिकोत्सवका अवसरमा डिजिटल पत्रिकाको मूल अवधारणा र धारलाई केही परिवर्तन गर्ने निर्णय लिइएको हाम्रा श्रद्धेय पाठकवर्ग, विज्ञापनदाता र शुभचिन्तकहरूलाई जानकारी गराउँदछौं । अब यस डिजिटल पत्रिकाले देशमा उद्यमशीलता विकास, नागरिकहरूको जीवनस्तर सुधार र उद्योग–व्यवसायमैत्री वातावरण सिर्जनालगायतका विषयमा आफूलाई केन्द्रीत गर्नेछ ।

यसै अवसरमा नेपाल समाचार केन्द्र प्रालि निकट भविष्यमा नै आर्थिक–व्यावसायिक क्षेत्रलाई समेट्ने गरी एउटा छुट्टै आर्थिक पत्रिका पनि प्रकाशन गर्ने पनि घोषणा गर्दछ । हाम्रो आगामी यात्रामा पनि सम्पूर्ण सहृदयी पाठक, विज्ञापनदाता, शुभचिन्तकहरूबाट अझ बढी साथ–सहयोग रहिरहने विश्वास व्यक्त गर्दछौं । तेस्रो वार्षिकोत्वसका अवसरमा हामी नयाँ आयामको पत्रकारितालाई अगाडि बढाउने प्रण गर्दछौं ।

प्रकाशित समय १२:२० बजे