प्रमुख प्रतिपक्ष दल नेपाली कांग्रेसले पार्टीको केन्द्रीय कार्यसमिति बैठक बोलाएको छ । जेठ १७ गते पार्टी कार्यालय सानेपामा बैठक बोलाइएको केन्द्रीय कार्यालयका मुख्यसचिव कृष्णप्रसाद पौडेलले जानकारी दिए ।

बैठकमा केन्द्रीय पदाधिकारी, केन्द्रीय सदस्य, आमन्त्रित केन्द्रीय सदस्यलाई अनिवार्य उपस्थितिका लागि निर्देशानुसार अनुरोध गरिएको मुख्यसचिव पौडेलले जनाएका छन् । उनका अनुसार संसदमा दर्ता भएको संविधान संशोधन प्रस्तावमा छलफल गर्न कांग्रेसले केन्द्रीय कार्यसमिति बैठक बोलाएको हो ।

यसैबीच संविधान संशोधनको विषय संसदको कार्यसूचीमा राखेर अन्तिम समयमा हटाएको बारेमा जानकारी दिन बिहीबार दिउँसो दुई बजे पत्रकार सम्मेलन गर्ने कांग्रेसको तयारी छ ।

लिम्पियाधुरा, लिपुलेक, कालापानी सहितको नयाँ नक्सा जारी भएपछि सोहीअनुसार निसान छाप परिवर्तन गर्नका लागि संविधान संशोधन प्रस्ताव दर्ता भएको हो । सो प्रस्ताव बुधबार संसदमा दर्ता गर्ने भनिए पनि अन्तिम समयमा आएर कार्यसूचीबाट हटाइएको थियो ।

प्रकाशित समय १२:४० बजे