संघीय संसदमा समानुपातिक कोटाबाट सदस्य रहेकी सरिता गिरी औपचारिक रुपमै पदमुक्त भएकी छन् । समाजवादी पार्टीको तर्फबाट सांसद रहेकी गिरीको सांसद पद रिक्त रहेको संसद सचिवालयले बिहीबार सूचनामार्फत जानकारी गराएको छ ।

सरकारले दर्ता गराएको संविधान संशोधनसम्बन्धी विधेयकविरुद्ध सांसद गिरीले प्रस्ताव दर्ता गराएपछि समाजवादी पार्टीले उनलाई सो प्रस्ताव फिर्ता लिन निर्देशन दिएको थियो । तर गिरीले दलको ह्वीप उल्लंघन गरी प्रस्ताव फिर्ता नलिएपछि समाजवादी पार्टीले कारबाही प्रक्रिया अगाडि बढाएको थियो ।

पार्टीको निर्णयअनुसार सरिता गिरीलाई सांसद पदबाट हटाइएकोबारे समाजवादी पार्टीले संसद सचिवालयलाई जानकारी गराएको थियो । समाजवादी पार्टीको समानुपातिक खस आर्य कोटाबाट गिरी सांसद भएकी थिइन् । रिक्त पदमा अब बन्द सूचीअनुसार लिला सिटौला सांसद बन्नेछिन् ।

प्रकाशित समय १६:१५ बजे