नेपाल उद्योग वाणिज्य महासंघको वरिष्ठ उपाध्यक्षमा चन्द्र ढकालले प्यानलसहित उम्मेदवारी घोषणा गरेका छन् । महासंघको वरिष्ठ उपाध्यक्षसहितका पदमा ढकालले मंगलबार प्यानलसहित उम्मेदवारी घोषणा गरेका हुन् ।

उम्मेदवारी घोषणा गर्दै आइएमई ग्रुपका अध्यक्ष ढकालले आफ्नो प्यानल विजयी हुने दाबी पनि गरेका छन् । ढकालले चुनाव जितेर गोल्छाकै टिमको सदस्य हुने पनि बताएका छन् । तर, गोल्छाले भने वरिष्ठ उपाध्यक्षका अर्का उम्मेदवार किशोर प्रधानको प्यानललाई समर्थन गर्ने संकेत गरेका छन् ।

वरिष्ठ उपाध्यक्ष स्वतः अध्यक्ष बन्नुपर्छ भन्ने पक्षमा आफू बलियोसँग उभिएको महासंघ उपाध्यक्ष ढकालको भनाइ छ । ‘म शेखरजीलाई एउटा प्रश्न सोध्न चाहन्छु, वरिष्ठ उपाध्यक्ष स्वतः अध्यक्ष बन्न पाउने व्यवस्था केका लागि गरियो ?’ विगत सम्झाउँदै ढकालले प्रश्न गरे, ‘वरिष्ठ उपाध्यक्ष स्वतः अध्यक्ष बन्न पाउने विषयमा म उभिएको हो, नउभिएको भए थाहा छैन अवस्था के हुने थियो ।’

ढकालको प्यानलबाट जिल्ला-नगर उपाध्यक्षमा गुणनिधि तिवारी उठ्दैछन् । तिवारी हाल महासंघको प्रदेश ५ कमिटी अध्यक्ष छन् ।

वस्तुगत उपाध्यक्षमा वर्तमान उपाध्यक्ष उमेशलाल श्रेष्ठ नै दोहोरिने भएका छन् भने एसोसिएट उपाध्यक्षमा ढकाल समूहले रामचन्द्र संघईलाई उम्मेदवार बनाउने भएको छ ।

प्रकाशित समय १४:५६ बजे