सेयर बजार परिसूचक नेप्से घट्दा पनि मंगलबार ४८ कम्पनीका लगानीकर्ताले कमाएका छन् । १८५ कम्पनीको कारोबार भएको बजारमा मंगलबार लगानीकर्ताले सस्ता कम्पनीको सेयर उठाएका छन् । मंगलबार बढेका कम्पनीमध्ये १४ कम्पनीको सेयर मूल्य प्रतिकित्ता २०० रुपैयाँ भन्दा तल छ ।

व्यापार, होटल, उत्पादनमूलक र म्युचुअल फन्डबाहेक बाँकी सबै समूह ओरालो लागेपछि समग्र बजार परिसूचक नकारात्मक बनेको छ । गत साताभर र यो साताको पहिलो दिन आइतबार गरी करिब डेढ सय अंकले बढेको बजार अल्पकालीन लगानीकर्ताले नाफा बुक गरेका कारण घटेको हो ।

मंगलबार कुल ४९ लाख ७६ हजार ४८८ कित्ता सेयर १ अर्ब ८७ करोड २२ लाख रूपैयाँमा कारोबार भएको छ । एनआइसी एसिया लघुवित्त, श्रीराम सुगर मिल्स र समृद्धि फाइनान्सको सेयर मूल्यमा सकारात्मक सर्किट लागेको छ । मंगलबार हिमालयन डिस्टिलरीको १४ करोड २४ लाख, एनएमबी बैंकको १३ करोड ९७ लाख, नेपाल रिइन्स्योरेन्स कम्पनीको १२ करोड ४२ लाख, एनआइसी एसियाको ११ करोड ४४ लाख र नेपाल लाइफ इन्स्योरेन्सको १० करोड २६ लाख रूपैयाँबराबरको सेयर किनबेच भएको छ ।

प्रकाशित समय १६:१६ बजे