हुम्लाको खार्पुनाथ गाउँपालिकाले घर‑घर पुगेर सामाजिक सुरक्षा भत्ता बाँड्दा ३० लाख बचत भएको जनाएको छ । देशका विभिन्न स्थानीय तहमा सामाजिक सुरक्षा भत्ता वितरणका क्रममा अनियमितता भएको जानकारी आइरहेका बेला गाउँपालिकाले आर्थिक वर्ष २०७६/७७ को अन्तिम चौमासिकमा घर‑घर गएर भत्ता बाँड्दा ३० लाख बचत भएको हो ।

सामाजिक सुरक्षा भत्ताका बारेमा विभिन्न नकारात्मक टिप्पणी भइरहेका बेला गाउँपालिकाले घरदैलो अभियान सञ्चालन गरेको अध्यक्ष कर्ण रावलले जानकारी दिए । मृत्यु भएर पनि मृत्यु दर्ता नगरेका, पाँच वर्ष पार गरिसकेका बालबालिकालगायतको लगत कट्टी गर्दा ३० लाख रकम बचत भएको उनले बताए ।

वास्तविक सामाजिक सुरक्षा भत्ता पाउनेहरूको पहिचान गर्न घरदैलो अभियान सञ्चालन गरिएको गाउँपालिकाका प्रवक्ता भीमराज शाहीले जानकारी दिए । उनका अनुसार एउटा वडाबाट करिब ६ लाख रुपैयाँ रकम बचेको छ ।

स्थलगत अभियानले हुम्लालगायत अन्य जिल्ला र स्थानीय तहमा सकारात्मक सन्देश प्रवाह गरेको स्थानीयले बताएका छन् ।

प्रकाशित समय १७:३८ बजे