सेयर लगानीकर्ताको सम्पत्ति एकै सातामा करिब ८४ अर्बले बढेको छ । आइतबार कारोबार खुल्नुअघि १८ खर्ब ४४ अर्ब रहेको कुल बजार पुँजीकरण साताको बिहीबार अन्तिम दिन बजार बन्द हुँदा १९ खर्ब २८ अर्ब रुपैयाँमा भएको छ । लगानीकर्ताको सम्पत्ति करिब साढे ४ प्रतिशत बढेको छ ।

नेप्से परिसूचक साताभरमा ६०.४७ अंकले बढेको छ । आइतबार १३९७.५७ अंकबाट कारोबार सुरु भएकोमा बिहीबार ४.३३ प्रतिशतले बढेर १४५८.०४ अंकमा पुगेको हो । सेयर बजार आइतबार १२ अंकले बढ्यो भने १ अर्ब १० करोडको कारोबार भयो । सोमबार २१ अंकले बढ्यो, २ अर्ब १३ करोडको कारोबार भयो । मंगलबार पनि नेप्से करिब १० अंकले बढ्यो भने करिब १ अर्ब ८ करोड रुपैयाँको सेयर खरिदबिक्री भयो ।

बुधबार सेयर बजार २१ अंकले नै बढ्यो भने २ अर्ब ६५ करोडको सेयर किनबेच भयो । त्यस्तै साताको अन्तिम दिन बिहीबार नेप्से ४ अंकले घट्दा १ अर्ब ९८ करोडको सेयर किनबेच भयो ।

त्यसैगरी, कारोबार रकम पनि गत साताको तुलनामा ९७ प्रतिशतले बढेको छ । गत साता ४ अर्ब ९४ करोडबराबरको सेयर खरिदब्रिकी भएकोमा यो साता ९ अर्ब ७४ करोडको सेयर खरिदबिक्री भएको छ ।

साप्ताहिक समीक्षा

उपसमूहअनुसार साताभरको कारोबार समीक्षा गर्दा व्यापारबाहेकका सबै उपसमूह बढेका छन् । व्यापार समूह ०.८४ प्रतिशतले घटेको छ भने उत्पादनमूलक समूह सबैभन्दा बढी ७.२१ प्रतिशतले बढेको छ । त्यस्तै निर्जीवन बिमा ६.९१, अन्य ६.२६, जीवन बिमा ५.६५, लघुवित्त ४.९७, बैंक ३.५३, जलविद्युत १.९९, विकास बैंक १.८, वित्त १.३६, होटल ०.९७ र म्युचुअल फन्ड ०.७६ प्रतिशतले बढेका छन् ।

निषेधाज्ञाका कारण घरमा थुनिएका लगानीकर्ताले छोटो समयका लागि सेयर बजारमा लगानी गरेको अनुमान गरिएको छ । लगानीकर्ताले बैंकको ब्याज सस्तो भएको मौका पारेर सेयर खरिद बढाएको कतिपयको बुझाइ छ । ब्रोकर कार्यालयमा अनलाइन दर्ता हुने क्रम पनि तीव्र गतिमा बढ्नुले पनि लगानीकर्ताले अनलाइनबाट सेयर किनबेच गर्ने क्रम ह्वात्तै बढेको प्रस्ट हुन्छ ।

नेपाल स्टक एक्सचेन्ज (नेप्से)का अनुसार बितेका दुई सातामा साढे ७ हजार अनलाइन लगानीकर्ता बढेका छन् । शुक्रबार सार्वजनिक तथ्यांकअनुसार दुई सातामा अनलाइन कारोबारका लागि युजर नेम र पासवर्ड लिनेको संख्या ७ हजार ४६० जनाले बढेको हो ।

साउन १९ गतेसम्म ५७ हजार १५७ जनाले युजर नेम र पासवर्ड लिएकोमा भदौ ११ गतेसम्ममा बढेर ६४ हजार ६१६ पुगेको छ । सुरुमा सरकारले कोरोनाभाइरस रोकथाम तथा नियन्त्रणका लागि लकडाउन तथा भदौ ३ पछि निषेधाज्ञा लागू गरेपछि अनलाइन प्रयोगकर्ताको संख्या बढेको हो । धितोपत्रको दोस्रो बजारमा कारोबार गर्ने सक्रिय लगानीकर्ताको संख्या पनि २ लाख ८७ हजार ८५४ पुगेको नेप्सेले जनाएको छ ।

प्रकाशित समय १४:५७ बजे