ग्लोकल टिन हिरो नेपाल २०२० मा प्रतिस्पर्धाका लागि मंगलबारबाट आवेदन  खुलेको छ । यो वर्ष ग्लोकल टिन हिरो नेपाल भर्चुअल रुपमा डिसेम्बर १२, २०२० मा हुने अनलाइन अवार्ड महोत्सव र सम्मेलनमार्फत घोषणा गरिनेछ ।

नेपालबाट २०१५ मा सुरु भई काठमाडौंका किशोरकिशोरीलाई मात्र लक्षित गरेर पछि २०१६ सम्ममा नेपालका सबै किशोरकिशोरीका लागि राष्ट्रिय मञ्च उपलब्ध गराउन राष्ट्रव्यापी रूपमा आफ्नो कार्य विस्तार गरेको थियो । हालसम्म नेपालका ५ किशोरकिशोरीलाई ग्लोकल टिन हिरो नेपालका रुपमा सम्मानित गरिएको छ भने ग्लोकल टिन हिरो इन्डियाबाट एकजना सम्मनित भएका छन । साथै २० अन्डर २० छनोट गरेर हालसम्म ७५ जनालाई सम्मानित गरिएको छ ।

ग्लोकलका संस्थापक आशिष ठाकुर महामारीका बीच यस वर्षको ग्लोकल टिन हिरो कार्यक्रम भइरहेको र डिजिटल प्रविधिको उपयोगसँगै किशोरकिशोरीको प्रतिभा प्रस्फुटन गर्न एवं उनीहरुको उपलब्धि पहिचान गर्न यसले महत्वपूर्ण भूमिका निर्वाह गर्ने बताउँछन् ।

किशोरकिशोरीमा भएको प्रेरणा र उत्साहलाई प्रस्फुटन गरी उनीहरुले समाजमा गरेको प्रभावकारी कार्यलाई कदर र अरु माझ चिनाउने कार्यक्रम ‘वाई वाई ग्लोकल टिन हिरो’ भर्चुअली आयोजना गरिएको हो । किशोरकिशोरीमा भएको उत्साह, रचनात्मक र सुरुवातको चाहनाको पहिचान गरी उनीहरुमा उद्यमी सोचको विकास गर्न कार्यक्रम आयोजना गरिएको ग्लोकल प्रालिले जनाएको छ ।

प्रकाशित समय १६:२३ बजे