राजधानीका स्थानीय तहमा मानव शरीरमा रोग प्रतिरोधी क्षमता वृद्धि गर्न सहयोग गर्ने वनस्पति गुर्जो रोप्नका लागि अभियान नै चलाइएको छ । गुर्जोका बिरुवा निःशुल्क बाँड्दै आएका आन्तरिक राजस्व कार्यालय लहानका प्रमुख कमलबहादुर राजलवटले सोमबार राजधानीका तीन स्थानीय तह र त्रिभुवन विश्वविद्यालयका चार विभागमा बिरुवा हस्तान्तरण गरेका छन् । बूढानीलकण्ठ नगरपालिकालाई २ सय, महालक्ष्मी नगरपालिकालाई २ सय र सूर्यविनायक नगरपालिका ५ लाई ३ सयवटा गुर्जोका बिरुवा प्रदान गरिएको उनले बताए ।

उनले कीर्तिपुरस्थित त्रिभुवन विश्वविद्यालयको वनस्पति, जीव विज्ञानलगायत विभागका लागि ८ सय र ललितपुरको ठैब क्षेत्रका लागि पनि ३ सय बिरुवा वितरण गरेका छन् । बूढानीलकण्ठ नगरपालिकामा कोरोनाभाइरस संक्रमण भई आइसोलेसन कक्षमा बसेका ३५ जनालाई गुर्जोबाट बनेको ३५ किलो चिया पनि नगर प्रमुख उद्धवप्रसाद खरेलमार्फत प्रदान गरिएको छ ।

उपत्यकामा एक घर एक गुर्जोको बिरुवा रोप्न अभियान नै चलाइएको छ । अभियानमा हाल उपत्यकामा क्रियाशील बागमती, रुद्रमती, विष्णुमती, चक्रपथलगायत क्षेत्रका सफाइ अभियानकर्मी पनि सहभागी भएका छन् । उपत्यकाका सबै नदी किनारमा गुर्जोको बिरुवा रोप्ने अभियान सुरु भइसकेको छ ।

गुर्जो मधुमेह, उच्च रक्तचाप, मौसमी रुघाखोकीलगायतका लागि औषधीको रूपमा प्रयोग हुन्छ । गर्भवती महिला र पाँच वर्षमुनिका बालबालिकालाई भने गुर्जो सेवन गराउन हुँदैन । हालसम्म लहानस्थित सरकारी निवास क्षेत्रमा हुर्काइएका करिब ७५ हजार गुर्जोका बिरुवा हालसम्म देशका विभिन्न भागमा पु-याइसकिएको छ ।

गुर्जो रोपण अभियानलाई देशव्यापी बनाउन राष्ट्रिय योजना आयोगका सहसचिव एवं योग शिक्षक किशोर जोशी, जीवन विज्ञानका योग प्रशिक्षक रामप्रसाद पन्थीलगायत अभियानकर्मी पनि राजलवटसँगै जुटेका छन् । (रासस)

प्रकाशित समय ०६:२९ बजे