कर्णाली प्रदेशका मुख्यमन्त्री एवं नेपाल कम्युनिष्ट पार्टी (नेकपा) संसदीय दलका नेता महेन्द्रबहादुर शाहीविरुद्ध दर्ता भएको अविश्वासको प्रस्तावमा हस्ताक्षर गर्ने सात जना सांसदले समर्थन फिर्ता गरेका छन् । माधवकुमार नेपाल समूह सम्वद्ध सांसदहरु उक्त सहमतिबाट पछि हटेका हुन् ।

मंगलबार भएको छलफलमा मुख्यमन्त्री शाही मन्त्रिपरिषद् पुनर्गठन गर्न सहमत भएपछि नेपाल समूहका सांसदहरु अविश्वासको प्रस्तावबाट पछि हटेका हुन् । नेपाल पक्षले थप तीन मन्त्री र संसदीय दलको सचेतक पद पाउने गरी सहमति भएको एक सांसदले न्युज कारोबारसँग बताए ।

यो सहमतिसँगै अविश्वास प्रस्तावमा हस्ताक्षर गरेका नेपाल समूहका ७ सांसदले समर्थन फिर्ता लिनेछन् । नेपाल निकटका चन्द्रबहादुर शाही (मुगु), अम्बरबहादुर थापा (दैलेख), सुशील थापा (दैलेख), पद्मा खड्का (सुर्खेत), कुर्मराज शाही (कालिकोट), करविर शाही (जाजरकोट) र देवी ओली (रुकुमपश्चिम)ले अविश्वास प्रस्तावबाट आफ्नो समर्थन फिर्ता गर्ने भएका हुन् । मुख्यमन्त्री शाहीले संसदीय दलको सचेतकमा कालिकोटका कुर्मराज शाहीलाई नियुक्त गरेका छन् । शाहीका अनुसार नेपाल समूहले पाउने मन्त्रीका संख्या र मन्त्रालयबारे अहिले छलफल जारी छ ।

मुख्यमन्त्री शाहीले ओलीनिकट संसदीय दलका प्रमुख सचेतक गुलावजंग शाहलाई आइतबार पदमुक्त गरेका थिए । शाहीविरुद्ध आइतबार नेकपाकै १८ सांसदले संसदीय दलमा अविश्वासको प्रस्ताव दर्ता गरेका थिए । शाहले मंगलबार दिउँसो १ बजेका लागि संसदीय दलको बैठक बोलाएका थिए । तर, नेपाल समूहका सांसदहरुले समर्थन फिर्ता लिने भएपछि बैठक अलपत्र परेको छ ।

प्रकाशित समय १४:१६ बजे