गत आर्थिक वर्ष २०७५/७६ मा देशभित्र विभिन्न सरकारी सेवामा १३ हजार ३१७ पदका लागि आवेदन मागिँदा ९ लाख ७२ हजारले आवेदन दिएका छन्, यसले नेपालमा चिन्तालाग्दो शैक्षिक बेरोजगारीको अवस्था रहेको देखाएको छ ।

लोकसेवा आयोगका अनुसार गत आर्थिक वर्षमा निजामती सेवातर्फ २ हजार ६०४ पदका लागि ४ लाख ५१ हजार २२६ जनाले आवेदन दिएका थिए भने स्थानीय निकायतर्फबो ९ हजार १६१ पदका लागि २ लाख १४ हजार ६६५ जनाले आवेदन दिएका छन् ।

यसैगरी, सुरक्षा निकाय र संगठित संस्थाका लागि १ हजार ५५२ पदमा आवेदनमा मागिँदा ३ लाख ६ हजार ३१९ जनाले आवेदन दिएको आयोगको प्रतिवेदनमा उल्लेख छ ।

यी आवेदकहरूमध्ये निजीमती सेवातर्फका ४ लाख ५१ हजार आवेदकबाट परीक्षा दस्तुरबापतमात्रै आयोगले गत वर्ष १६ करोड ९७ लाख रूपैयाँ आर्जन गरेको छ । अघिल्लो आर्थिक वर्ष २०७५/७६ मा ६ लाख ७२ हजार ८०८ जना आवेदकबाट परीक्षा दस्तुरबापत २५ करोड ८७ लाख रूपैयाँ आर्जन भएको आयोगको प्रतिवेदनमा उल्लेख छ ।

लोकसेवा आयोगको रेकर्डअनुसार आर्थिक वर्ष २०७३/७४मा सर्वाधिक धेरै ८ लाख ४४ हजार २२९ जनाले निजामती सेवाका विभिन्न पदमा आवेदन दिएका थिए । ती आवेदकबाट २१ करोड ३२ लाख रूपैयाँ परीक्षा दस्तुरबापत आयोगले राजस्व संकलन गरेकोब् थियो ।

समावेशी कोटाबाट पाए साढे २१ हजारले जागिर

नेपालमा २०६४ सालदेखि लागू गरिएको समावेशी कोटाअन्तर्गत हालसम्म २१ हजार ६४९ जनाले सरकारी जागिरमा अवसर पाएका छन् । लोकसेवा आयोगका अनुसार आर्थिक वर्ष २०६४/६४ बाट  सुरु गरिएको निजामती सेवामा समावेशी कोटाअन्तर्गत उनीहरूले सरकारी सेवामा रोजगारीका अवसर पाएका हुन् ।

सरकारी सेवामा दरबन्दीलाई सत प्रतिशत मानेर त्यसको ४५ प्रतिशत समावेशी कोटाका लागि छुट्याइन्छ । त्यो ४५ प्रतिशतलाई पनि महिला, आदिवासी जनजाति, दलित, अपाङ्ग र पिछडिएको क्षेत्रमा वर्गीकरण गरेर प्रतिशतका आधारमा समावेशी कोटा निर्धारण गरिन्छ ।

लोकसेवा आयोगको प्रतिवेदनअनुसार हालसम्म समावेशी सिफारिस भएका उम्मेदवारहरूमध्ये ७ हजार ३३१ जना (३३.८३ प्रतिशत), आदिवासी जनजाति ५ हजार ७५४ जना (२६.४७ प्रतिशत) र मधेशी कोटामा ४ हजार ७४१ जना (२१.८० प्रतिशत) छन् ।

यसैगरी, दलित कोटामा १ हजार ९७१ जना (९.१० प्रतिशत), अपांगता भएका ९९६ जना (४.६० प्रतिशत) र पिछडिएको क्षेत्रबाट ७७३ जना (३.५७ प्रतिशत) सिफारिस भएको लोकसेवा आयोगका प्रतिवेदनमा उल्लेख छ ।

अपांगता भएकालाई कम अवसर

गत आर्थिक वर्ष २०७६/७७ मा २ हजार ६०४ पदका लागि दरखास्त मागिएकोमा १ हजार ६६८ पद समावेशी कोटाका लागि छुट्याइएको थियो । यी पदका लागि ४ लाख ५१ हजार ५२६ जनाले आवेदन गरेकोमा समावेशी कोटाबाट १ लाख ९४ हजार २२३ जनाले आवेदन हालेका थिए ।

गत आर्थिक वर्षमा समावेशीतर्फ अपांगता भएका व्यक्तिका लागि कुल ६२ वटा पदमा आवेदन मागिँदा ४ हजार ५५३ जनाले आवेदन दिए, तर जम्मा ३ जनालाई सहायक स्तरका जागिरका लागि सिफारिस गरियो । यो गत गत आर्थिक वर्षमा गरिएको कुल समावेशी सिफारिसको ०.३३ प्रतिशतमात्रै हो ।

प्रकाशित समय १६:१७ बजे