प्रधानमन्त्री भएलगत्तै केपी ओलीको पहिलो घोषणा थियो, ‘खाल्डाखुल्डीमा परेर अब कसैले ज्यान गुमाउनुपर्ने छैन । सडक चिल्ला हुनेछन्, खाल्डा पुरिनेछन् ।’ त्यसअघिका प्रधानमन्त्री शेरबहादुर देउवाले गएको साउनमा महीना दिनभित्र उपत्यका सडकका सबै खाडल पुर्न निर्देशन दिएका थिए । निर्देशन र भाषण जति दिए पनि न त देउवाले सडकको खाल्डा खुल्डी पुर्न सके न त ओलीले नै ।

सडकका धराप खाल्डा पुर्ने सरकारी निकायको बेवास्ताले सडकका खाल्डामा परेर ज्यान गुमाउने क्रम भने रोकिएको छैन । गएको शनिबार कीर्तिपुर नगरपालिका–१० स्थित त्रिभुवन विश्वविद्यालयको गेट अगाडि रहेको खुल्ला मंंगलमा परी एक जनाको ज्यान गयो ।

तर पनि खाल्डामा परेर घाइते हुने तथा मृत्यू हुने नियमित आकस्मिकतालाई निवारण गर्न भने कसैले चासो दिएको देखिँदैन । उपत्यकाका अधिकांश ढलको मंगलमा ढक्कन नहुँदा यात्रुको ज्यानै जाँदा पनि सम्बन्धित निकायले ढक्कन लगाएका छैनन् । जसका कारण पैदलयात्री मोटरसाइकल तथा साइकलयात्री जोखिममा छन् ।

उपत्यकाका ३ वटै जिल्लाका विभिन्न ठांउँमा ढलको मंगलमा ढक्कन लगाइएको छैन । मंगल लगाइएका ठाउँमा पनि पानी चुहिएर शहर दुर्गन्धित बनेको छ । सडकमा बगेको ढलका कारण दुर्गन्ध फैलिएपछि यात्रुहरु नाक छोपेर गन्तव्यतर्फ गईरहेका देखिन्छन् । यति हुँदा पनि काठमाडौं, ललितपुर महानगरपालिकाका जनप्रतिनिधिलाई नै आफ्ना नागरिकको सुरक्षामा वास्ता नभएको स्थानीयको गुनासो छ ।

यस्तै लापरबाही ललितपुरको पुल्चोक चुनदेवी मन्दिर क्षेत्रमा पनि देखिएको छ । त्यहाँ वरिपरिको ढलबाट पानी चुहिएर कुपण्डोल मूल सडकमै ढल बगेको छ । ढलको डुङडुङ्ती गन्हाउने पानी बगेर हरिहर भवनस्थित मन्त्री क्वाटर नजिकसम्म आइपुगेको छ । पैदलयात्रु नाक छोपेर हिड्न बाध्य छन् । मन्त्री क्वाटर जाने पैदलयात्रुलेसमेत नाक खुम्च्याउँदै जानुपर्ने अवस्था छ ।

ढलको मंगलमा राखिएको ढकनी खुला भएकाले दुर्घटना हुने जोखिम पनि उत्तिकै छ । ढक्कन भएका कतिपय मंगलहरुमासमेत आधा मात्र छोपिएको छ । त्यहा पनि दुर्घटना हुने जोखिम त छँदै छ, वरपर पनि दुर्गन्ध फैलिएको छ ।

ढल पुर्न सिंहदरबारको आदेश पाउनुपर्ने
सिंहदरबारको सम्पूर्ण अधिकार अझै नगरपालिकामा नआएकाले आफूहरुले काम गर्न नसकेको भन्दै जनप्रतिनिधिहरु पन्छन्छन् । ढल छोप्ने जस्ता समान्य विषयमासमेत केन्द्रको आदेश कुर्नुपर्ने जवाफ दिन्छन् उनीहरु ।

सामान्य प्रशासन मन्त्रालयको स्पष्ट नीति निर्देशन नदिएकोले काम गर्न अफ्ठेरो परेको ललितपुर महानगरपालिकाका प्रमुख चिरीबाबु महर्जन बताउँछन् । ‘कानुन बन्न बाँकी छन्, पर्याप्त कर्मचारी छैनन्, यसैले सोचे अनुसार काम हुन सकेको छैन,’ जवाफदेहीता र जिम्मेवारीबाट पन्छिँदै उनले भने ।

उपत्यका खानेपानी संस्थान लिमिटेड, मेलम्ची खानेपानी आयोजनालगायतले ढल बनाएकाले उनीहरुसँग समन्वय गरेर ढलका मंगलका ढक्कन छिट्टै लगाउने महर्जनले बताए । फुटेका गन्हाउने ढल खाल्डा, धुलो, धुवाँ, ट्राफिक जाम काठमाडौं उपत्यकाका सडकको परिचय नै बदल्न आफू लागिपरेको उनले दावी गरे । महर्जन भन्छन ‘फुटेका ढल, धुलो, हिलो र खाल्डाखुल्डी सडकका कारण दुर्घटना बढेको हामीलाई थाहा छ, त्यसलाई न्यूनिकरण गर्न ति पुर्वाधार सुधारमा ध्यान दिँदै अघि बढ्ने छौं ।’