शरद भेषवाकरको कप्तानीमा मैदानमा उत्रिएको घरेलु टिम पोखरा पल्टन नमस्ते पोखरा प्रिमियर लिग (पीपीएल) टी–२० क्रिकेट प्रतियोगिताको उपाधिनजिक पुगेको छ । ६ टिम सहभागी प्रतियोगितामा चार टिमसँग समान ६ अंक भए पनि रनरेटका आधारमा पोखरा समूहकै शीर्ष स्थानमा रहँदै फाइनलमा यात्रा बनाएको हो ।

कात्तिक ९ देखि पोखरामा सुरु भएको प्रतियोगितामा पोखरासँगै चितवन राइनोज, हुलास काठमाडौं रोयल्स, एक्स्पर्ट धनगढीले लिग चरणका पाँच खेलमध्येमा तीन÷तीन खेलमा जितसँगै समान ६ अंक प्राप्त गरे पनि रनरेटका आधारमा पोखरा समूह चरणकै शीर्ष स्थानमा रहन सफल भएको हो । प्रतियोगितामा लिग चरणका खेल सकिँदा धनगढी, बुटवल र विराटनगर प्रतियोगिताबाट बाहिरिएका छन् । बुटवलले पाँच खेलमध्ये दुई तथा विराटनगरले एकमात्र खेल जित्न सक्यो ।

शनिबार भएको लिग चरणको खेलमा पोखराले काठमाडौंमाथि चार विकेटको जित निकाल्यो । १ सय ४ रनको लक्ष्य पछ्याएको पोखराले १५.५ ओभरमा लक्ष्य पूरा गरेको हो । कुशल भुर्तेलले १४, आरिफ शेख १६ रन जोड्ुदा विनोद भण्डारी शुन्य रनमा आउट भएका थिए । बलिङतर्फ काठमाडौंका अमरसिंह रौटेलाले तीन विकेट लिए ।

यसअघि, टस हारेर ब्याटिङको निम्तो पाएको काठमाडौले १९.१ ओभरमा १ सय ३ रनको योगफल तयार पार्यो । कप्तान ज्ञानेन्द्र मल्लले सर्वाधिक ३१, अमित श्रेष्ठले २१, पवन सर्राफ १२, नरेश बुढाऐर ६, आदिल खान ७ रन जोडे । वसन्त रेग्मीले नटआउट १९ रन जोडे । बलिङतर्फ पोखराका ललित राजवंशीले ३ र मोहम्मद नाभिदले २ विकेट लिन सफल भए ।

प्रतियोगिताको फाइनल यात्राका लागि भने काठमाडौं र चितवनले आइतबार प्रतिस्प्रर्धा गर्नेछन् । अंक तालिकाको पुच्छारमा रहेको सन्दीप लामिछानेको टिम विराटनगरलाई लिग चरणको अन्तिम खेलमा पारस खड्काको टिम चितवनले शनिबार कठिन जित हासिल गरेसँगै दोस्रो चरणमा प्रवेश गरेको हो ।

लिगको अन्तिम खेलमा चितवन राइनोजले विराटनगर टाइटन्सलाई चार विकेटले पराजित गर्यो । विराटनगरले दिएको १ सय ४६ रनको लक्ष्य चितवनले ३ बल बाँकी छँदा ६ विकेटको क्षतिमा पूरा गरेको हो ।

चितवनको जितमा सनी पटेलले नटआउट ५१ रन जोड्दा आरिफ सेखले ३५, समित पटेलले २१, अनिल साहले १३ रन जोडे । १९औं ओभरमा चितवनका सनी पटेलले २ छक्का प्रहार गरे । सनी पटेलले ४ चौका र ४ छक्का प्रहार गरी अर्धशतक पूरा गरेका हुन् । बलिङतर्फ सन्दीप लामिछानेले ४ तथा सुनिल धमला र साहब आलमले समान एक विकेट लिए ।

यसअघि टस जितेर ब्याटिङ रोजेको विराटनगरले निर्धारित २० ओभरमा ५ विकेट गुमाउँदै १ सय ४५ रनको योगफल तयार पारेको थियो । विराटनगरका लागि मोहम्मद जाहिद आलमले ५१, सुनिल धमालाले ४७ तथा प्रदीप ऐरी र पुष्प थापाले समान ११ रन जोडे । बलिङतर्फ चितवनका एसके पटेल र कप्तान पारस खड्काले समान २ विकेट लिए भने करन केसीले एक विकेट लिए ।

फाइनल प्रवेशका लागि शनिबार काठमाडौं र चितवनबीच बिहान ९ बजेपछि पोखरा रंगशालामा खेल हुनेछ । प्रतियोगिताको विजेता टोलीले उपाधिसहित २७ लाख नगद पुरस्कार प्राप्त गर्नेछ । प्रवेश निःशुल्क रहेको प्रतियोगिताको अवलोकन गर्न पोखरेली दर्शकको उत्साहजनक सहभागिता छ । फाइनल खेल कात्तिक २० गते हुनेछ ।

प्रकाशित समय २१:०१ बजे