विवाह सामान्यतः शारीरीक रुपमा परिपक्व भएपछि गरिने एक सामाजिक परम्परा हो । विवाहसम्बन्धी विभिन्न नीति–नियम पनि बनाइएको हुन्छ । नेपालमा २० वर्ष पूरा नभई गरिने विवाहलाई गैरकानुनी मानिन्छ ।

सुन्दा अचम्म, तर सत्य ! केन्याको एउटा समुदाय छ, जहाँ छोरी जन्मेकै दिन विवाहको कुरा छिनिन्छ । केन्याको ताना रिभर क्षेत्रको ओरोमो समुदायमा छोरी जन्मिएको दिन नै विवाह गर्ने परम्परा छ । यो समुदायमा छोरी जन्मिएकै दिन बुबाले केटा छानिदिन्छन् । केटालाई घरमा बोलाएर विवाह गर्ने प्रचलन छ । तर, छोरीलाई केटाको घरमा भने ठूली भएपछि मात्र पठाइन्छ ।

यसरी विवाह गर्नाले आफूलाई केही भइहाले छोरीलाई कसैले ख्याल गर्छन् भन्ने विश्वासले जन्मेकै दिन विवाह गर्ने प्रचलन रहेको हो । परिवारले जुन केटालाई दिइएको हो, छोरीले त्यही केटासँग विवाह गर्नुपर्छ । केटाले पनि त्यहीँ केटीसँग विवाह गर्नुपर्ने हुन्छ ।

बालिकाको विवाहको कुरा छिनिसकेको देखाउन दुलाहाका बुवाले उनको नाडीमा ‘दरारा’ बानिदिन्छन् । छोरीको हातमा बाँधेको डोरी देखाउँदै एक महिलाले बीबीसीलाई भनिन्, ‘यो हाम्रो संस्कृति हो, हामी यस्तै होस् भन्ने चाहन्छौं ।’

हातमा बाँधिएको दराराले उनी सानै भए पनि विवाह भएकोे भन्ने संकेत गर्छ । जन्मिएकै दिन गरिएको यस्तो विवाहलाई छोरी ठूली भएपछि नाइँ भन्न पाइँदैन । यो परम्पराले परिवारबीचको मिलनलाई बलियो बनाउने उक्त समुदायको विश्वास छ ।

प्रकाशित समय १६:४५ बजे