धर्म प्रचार गरेको भन्दै विश्वभर बदनाम युनिभर्सल पिस फेडेरेसन नामक धार्मिक गैरसरकारी संस्थाले आयोजना गरेको कार्यक्रममा सहभागी हुने पाहुनालाई भेट्न प्रधानमन्त्री केपी ओलीले तीन दिन बालुवाटार छाड्ने भएका छन् ।

सो संस्थाले आयोजना गरेको विवादित एसिया प्यासिफिक समिटमा आएका विदेशी पाहुनालाई भेट्न भन्दै ओली होटल सोल्टीमा बसेका छन् । कुटनीतिक रुपमा असहज र अस्वभाविकता देखिने गरी ओली होटलमा बसेका हुन् ।

विभिन्न देशका राष्ट्रप्रमुख, सरकारप्रमुख तथा विशिष्ट व्यक्तिहरुसँगको भेटघाटका लागि सहज हुने हुनाले प्रधानमन्त्री होटलमै बसेका प्रधानमन्त्रीका सचिवालयले जनाएको छ ।

विवादित कार्यक्रमका लागि आएका पाहुनालाई सरकारी निवास बालुवाटार बोलाएर भेट्दा थप आलोचना हुने डरले प्रधानमन्त्रीलाई होटल सोल्टीमै राखेर भेटघाट गराउन लागिएको अनुमान गरिएको छ । त्यसो त आउने–जाने समयको बचत गर्नका पनि बिहीबारबाटै सोल्टीमा बसेको बताईको छ । उनी शनिबारसम्म त्यहानै रहने जनाइएको छ ।

सम्मेलनमा सहभागी हुन ७ देशका राष्ट्र र सरकार प्रमुख तथा उपप्रमुख, १० जना पूर्वराष्ट्रप्रमुख र सरकारप्रमुखलगायत उपस्थित भएका छन् । सम्मेलनमा भाग लिन म्यानमारकी स्टेट काउन्सिलर आङ सान सुकी र कम्बोडियाका प्रधानमन्त्री हुन सेन बिहीबार आएका छन । उनीहरूलाई होटल सोल्टीमा राखिएको छ । न्युजिल्यान्डको पूर्वउपनिवेश समोआ आइल्यान्डका राजारानी, मार्सल आइल्यान्डका राष्ट्रपति, पालाओ आइल्यान्डका राष्ट्र प्रमुख, पाकिस्तानका पूर्वप्रधानमन्त्री युसुफ रजा गिलानी र भारतका पूर्वप्रधानमन्त्री एचडी देवेगौडा शुक्रबार आउँदै छन् ।

उनीहरू सबैलाई सोल्टीमै प्रधानमन्त्री ओलीले रात्रिभोज दिँदै छन् । शुक्रबार साझ रात्रीभोज दिने कार्यक्रम छ ।

सम्मेलनमा सहभागि हुन विभिन्न राष्ट्रका राष्ट्र प्रमुख तथा प्रतिनिधिहरु आउने क्रम जारी छ । दक्षिण कोरियामा रहेको अन्तर्राष्ट्रिय संस्था युनिभर्सल पिस फेडरेसन (यूपीएफ) को नेपाल च्याप्टरले आयोजना गरेको सम्मेलनमा विभिन्न ४५ देशका झण्डै १५ सय प्रतिनिधि सहभागी हुने बताइएको छ ।

विभिन्न देशका सरकार प्रमुखसहित यति धेरै प्रतिनिधि बोलाएर हुन लागेको यो सम्मेलन नेपालमै पहिलो पटक हुन लागेको ठूलो अन्तर्राष्ट्रिय सम्मेलन भएको आयोजकको दावी छ । संविधानले निषेध गरेको धर्म प्रचारको बारेमा छलफल हुने भनिए पनि सम्मेलनमा आत्मनिर्भरता, पारस्परिक समृद्धि लगायतका विषयमा छलफल हुने आयोजकको दावी छ ।

विवादित सस्था युनिभर्सल पिस फेडेरेसनले आयोजना गर्न लागेको सम्मेलन सुरु नहुँदैबाट विवादित बन्न पुगेको छ । सम्मेलनका लागि बाँडिएका निम्तो कार्डमा गैरसरकारी संस्थाको लोगो मुनि नेपाल सरकार र संघीय संसदको लोगो प्रयोग गर्दै नेपाल सरकार कार्यक्रमको सह–आयोजक भएपछि कांग्रेसलगायतका दलले आपत्ति जनाएका थिए । संविधानले धर्म निरपेक्षतालाई अनुसरण गर्ने तर सरकार नै कुनै एक धर्मको प्रचारमा सह–आयोजक बन्न खोज्नुले संविधानको बर्खिलाफ भएको भन्दै विरोध जनाएको थियो । व्यापक विरोध हुन थालेपछि सरकार सम्मेलनको सह–आयोजकबाट फिर्ता भएर सहआयोजक नभई सहयोगी मात्रै बनेको छ ।

यस्तै राष्ट्रिय प्रजातन्त्र पार्टी नेपालका अध्यक्ष कमल थापाले पनि धर्मप्रचारक संस्थाले आयोजना गरेको विवादास्पद भेलामा सहभागी पाहुनालाइ गरिएको स्वागत अवाञ्छित रहेको बताएका छन् ।

प्रकाशित समय १८:११ बजे