भिजन लुम्बिनीले २५ मेगावाट क्षमताको सेती खोला जलविद्युत् आयोजनाको तिन बर्ष भित्र निर्माण सम्पन्न गर्ने गरी कार्य अगाडि बढाएको जनाएको छ । करिब ५ अर्बको लागतमा एक हजार बढी लगानीकर्ताको सामूहिक लगानीमा सो आयोजना कास्कीको माछापुच्छ्रे गाउँपालिका २ को भराभुरीमा बन्ने भएको भिजन लुम्बिनीका अध्यक्ष जगत बहादुर पोखरेलले जानकारी दिए ।

पोखरेलले भने, ‘जलश्रोतको अपार भण्डार, प्राकृतिक सम्पदाको मुहान सहित पर्यटकीय सौन्र्दयले भरपूर नेपाल गरीब छैन । हामी धनी बनाएर सबैलाइ आर्थिक समृद्धिसँग जोड्न चाहन्छौं ।’

भिजन लुम्बिनी अन्तर्गतको भिजन लुम्बिनी ऊर्जा कम्पनी लिमिटेडले बुटवलमा पत्रकार सम्मेलन गर्दै आयोजनालाई रुपन्देहीकै गौरवको रुपमा विकास गरिने जनाएको छ ।

आयोजनाको तत्तकालै निर्माण आरम्भ गरिने छ । आयोजनाको मंसिर ६ गते नेपाल विद्युत् प्राधिकरण र भिजन लुम्बिनी ऊर्जा कम्पनीबीच विद्युत् खरीद सम्झौता समेत भइसकेको छ ।

सम्झौता अनुसार आयोजनाबट उत्पादित विद्युत् वर्षायाको ६ महिना प्रतियुनिट चार रुपैयाँ ८० पैसा र हिउदको ६ महिना प्रतियुनिट आठ रुपैयाँ ४० पैसामा प्राधिकरणले खरिद गर्नेछ ।

प्राधिकरणका योजना अनुगमन तथा सूचना प्रविधि निर्देशनालयका उपकार्यकारी निर्देशक जगदिश्वरमान सिंह र कम्पनीका अध्यक्ष जगत पोखरेलले पिपिएमा हस्ताक्षर सहित सम्झौता गरेको आयोजनाका इन्जिनियर लेखनाथ पाण्डेले बताए ।आयोजनामा स्थानीयबासीलाई समेत सेयर दिइने प्रवद्र्धक कम्पनीका प्राविधिक इन्चार्ज रतनलाल अग्रवालले बताए । आयोजनाको ३० प्रतिशत स्वपुँजी रहने र ७० प्रतिशत बैंक तथा वित्तीय संस्थाका तर्फबाट ऋण लिइनेछ । स्वपुँजीमा बुटवल र कास्कीका लगानीकर्तालाई समेत सहभागी गराइने उर्जा कम्पनीले जनाएको छ ।

प्रकाशित समय १८:४९ बजे