नेपाली स्थानीय घरेलु तथा साना उद्योगका उत्पादनको प्रवर्द्धनका लागि १५ औं अन्तर्राष्ट्रिय औद्योगिक व्यापार मेला तथा घरेलु उद्योग महोत्सव हुने भएको छ ।

नेपाल घरेलु तथा साना उद्योग महासंघले फागुन २३ देखि २७ गतेसम्म काठमाडौंमा महोत्सव आयोजना गर्न लागेको हो । मुलुकभरका झण्डै चार लाख लघु, घरेलु तथा साना उद्योगहरुलाई प्रतिबिम्बित गर्ने प्रदर्शनीको मुख्य उद्देश्य रहेको महासंघका कार्यवाहक अध्यक्ष उमेशप्रसाद सिंहले जानकारी दिए ।

‘प्रविधि प्रयोग र अन्य क्षमता विकासका हिसाबले उद्योगहरु प्रतिस्पर्धी र प्रतिफल दिन नसकिरहेका कारणले युवा पुस्ता यस्ता उद्योगप्रति आकर्षित हुन सकिरहेका छैनन् ।’ अध्यक्ष सिंहले भने– ‘परिणामतः यस्ता उद्योगहरूमा पुस्ता हस्तान्तरणको समस्या छ । एक अर्काबाट सिक्न तथा ज्ञान र सीप आदान हुने अपेक्षाका साथ महोत्सव गर्न लागिएको हो ।’

बीटुबी, बीटुसी, बीटुजी जस्ता अन्तरक्रिया, छलफल, सांस्कृतिक कार्यक्रम र खाद्य प्रदर्शनी गरिने महासंघले जनाएको छ । प्रदर्शनीमा सातै प्रदेश र जिल्लाका उद्यमी, प्रविधि प्रयोगकर्ता र भारत, पाकिस्तान, बंगलादेश लगायत सार्क मुलुक तथा चीनको सहभागिता रहने बताइएको छ ।

प्रदर्शनीमा २०० स्टल हुनेछन् । महोत्सवमा सात करोड रुपैयाँभन्दा बढी आर्थिक कारोबार हुने प्रक्षेपण गरिएको छ ।

प्रकाशित समय १७:२३ बजे