१७ औं संस्करणको आहा रारा गोल्ड कप फुटवल प्रतियोगिता २०७५ को उपाधिको लागि नेपालका दुई चर्चित प्रतिद्वन्दी थ्री स्टार क्लबविरुद्ध विभागीय टोली त्रिभुवन आर्मी क्लबबीच शनिबार फाइनल खेल हुने भएको छ । उपाधिसहित नगद ८ लाख एक हजार पुरस्कारको लागि दुवै टिम शनिबार दिउँसो २ बजे फाईनलमा प्रतिष्पर्धा गर्ने आयोजक सहारा क्लब पोखराले जनाएको छ ।

दुवै टिमले फाइनल खेलमा उपाधी जित्ने दावी गरेका छन् । क्लबले सुक्रबार पोखरामा आयोजना गरेको प्रि-म्याच कन्फरेन्समा दुवै टिमका प्रशिक्षकहरुले फाइनल खेलमा जित्ने दावी गरे ।

थ्रीस्टारका प्रशिक्षक मेघराज केसीले आहा राराको फाइनल देशकै राम्रा टिमहरुको फाइनल भएकोले आफूहरुले पोखरेलीहरु माझ उत्कृष्ट फुटबल प्रर्दन गर्ने दावी गरे । उनले भने, ‘हामीले फाइनल खेलमा जित्ने गरी खेल्ने तयारी गरेकाछौं, हामीसँग अनुभवी खेलाडीहरु छन् । हाम्रा खेलाडीहरुले हाम्रो रणनीति अनुसार खेल्न सकेमा हाम्रो जित हुन्छ ।’

त्यस्तै आर्मीका प्रशिक्षक नवीन न्यौपानेले आहा रारा गोल्ड कपको उपाधि आफूहरूले जित्ने राम्रो अवसर जुटेको बताए । उनले भने, ‘हामी फाइनल खेल जित्ने गरी आहा रारामा नयाँ इतिहास रच्न शतप्रतिशत बलवुताले भ्याएसम्म खेल्ने छौं।’

आहा राराको ७ औं, ८ औं र १४ औं उक्त गोल्ड कपमा फानलमा प्रवेस गरेर पनि उपाधि चुम्न चुकेको आर्मी यस पटक उपाधि जित्ने दाउमा छ । यता आहा राराको तीन पटक विजेता हुँदै १२  औं पटक सहभागी थ्रीस्टारले भने चौथो पटक उपाधि जित्ने लक्ष्यका साथ मैदानमा उत्रिने तयारी गरेको छ ।

थ्रीस्टारले ५ औं, ९ औं र ११ औं आहा रारा गोल्ड कपको उपाधि जितेको छ  । आहा रारामा यस अघि पुलिसले ६ पटक, मनाङ मर्स्याङ्दी क्लबले ५ पटक, आयोजक सहारा क्लब र अफ्रिकन यूनाइटेड क्लवले एक/एक पटक उपाधि जितेका छन् ।

प्रकाशित समय १९:३३ बजे