प्रहरीले धमाधम पक्राउ गर्न थालेपछि नेकपाको विप्लव समुहका नेता कार्यकर्ता फेसबुक अकाउन्ट समेत ‘डिएक्टिभेट’ गरेर भूमिगत भएका छन् । विप्लबको पार्टीका गतिविधिप्रति सरकार कठोर बन्दै गएपछि अधिकाश नेता, कार्यकर्ताले मोवाईल फोन स्विच अफ र फेसबुक अकाउन्टसमेत ‘डिएक्टिभेट’ गरेका छन् ।
पार्टीका शीर्ष तहका नेतादेखि कार्यकर्तासम्म धमाधाम पक्राउ पर्न थालेपछि सामाजिक संञ्जालमा सक्रिय दर्जनभन्दा बढी नेताहरुले फेसबुक ‘डिएक्टिभेट’ गरेका छन् । फेसबुक अकाउन्टबाट व्यक्तिको पृष्ठभूमि, गतिविधि एवं लग इन भएको लोकेसन ट्रयाक गर्न सकिने भएकाले उनीहरुले ‘डिएक्टिभेट’ गरेका हुन् ।
संयोजक नेत्रविक्रम चन्द विप्लवको सक्रिय एकान्ट तथा फेबबुक पेज अहिले निश्कृय छ । खड्कबहादुर विश्वकर्मा (प्रवक्ता) र कमाण्डरहरु अनिल शर्मा ‘बिरही’ (पूर्वी कमाण्ड इन्चार्ज) को फेसबुक अकाउन्ट एक साता अघिदेखि निस्कृय छ । अरु नेताहरु सन्तोष बुढामगर, धर्मेन्द्र बास्तोला (पश्चिम कमाण्ड), मोहलाल चन्द, नेतृ उमा भुजेललगायतले पनि फेसबुकमा कुनै सामाग्री राखेका छैनन् । सगरमाथा ब्यूरोका प्रमुख दिपेश राई, जनकपुर ब्यूरोका प्रमुख सन्देश पौडेललगायतका नेताहरुले पनि आफ्नो एकाउन्ट ‘डिएक्टिभेट’ गरेका छन् । अधिकाँश जिल्ला तहका नेताहरूले समेत सामाजिक सञ्जाल लग इन गरेका छैनन् । उनीहरुले धेरै दिनदेखि कुनै पनि सामाग्री अपडेट गरेका छैनन् भने म्यासेन्जरमा समेत अनलाइर्न देखिएका छैनन् । विप्लव समुहका एक नेताले भने ‘पहिले फेसबुकमा राखिएका सामग्रीबाट पृष्ठभूमी थाहा हुने र फेसबुक लग इन गरिएपछि प्रहरीले लोकेसन ट्रयाक गर्न सक्ने हुदा ‘डिएक्टिभेट’ गर्न थालेका हौँ । ’
मोहन कार्की ‘जीवन्त’, हेमन्तप्रकाश ओली सुदर्शनलगायतका नेताहरु फेसबुकबाटै ट्रयाकिङमा परेको जानकारी पाएपछि अरु नेता कार्यकर्तासमेत फेसबुकलगायत सामाजिक सञ्जालबाट अलग भएका हुन् । प्रतिबन्धित नेकपा स्रोतहरुको दाबी अनुसार ओली काभ्रेबाट पक्राउ परेका थिए । त्यसयता नेता कार्यकर्ताले फेसबुक चलाउन छोड्ने कार्यले तीब्रता पाएको हो ।
तल्लो तहका कार्यकर्ताले भने सामाजिक सञ्जालमार्फत पार्टीको समर्थनमा विभिन्न गतिविधि जारी राखेका छन् । विप्लव समुहनिकट पत्रकारहरूले भने फेसबुकलगायतका सामाजिक संञ्जालबाट पक्षमा सामाग्री पोष्ट गरिरहेका छन् । अहिलेसम्म सो समुहका ५०भन्दा बढी नेता कार्यकर्ताहरु पक्राउ परिसकेका प्रहरी स्रोतले बताएको छ ।

प्रकाशित समय १८:२८ बजे