विश्वकफ फुटबलको समूह बीअन्तर्गत पहिलो जित दर्ता गराएको स्पेनले दास्रो चरणमा प्रवेश गर्ने सम्भावना बलियो पारेको छ । कजानस्थित कजान एरिनामा गएराति स्पेनले इरानविरुद्ध संघर्षपूर्ण जित निकाल्दै दोस्रो चरणको सम्भावना बलियो बनाएको हो ।

निकै प्रतिस्पर्धात्मक खेल पहिलो हाफ बराबरीमा सकिएको थियो । तर, ५४ औँ मिनेटमा डिएगो कोस्टाले गोल गरेर स्पेनको जित सुनिश्चित गराए । उनले पोर्चुगलसँग ३–३ मा टुंगिएको खेलमा पनि दुई गोल गरेका छन् । सन् २००६ को विश्व कप पछि लगातार दुई खेलमा गोल गर्ने कोस्टा पहिलो स्पेनिस खेलाडी बनेका छन् । त्यति बेला फर्नान्डो टोरेसले दुई खेलमा लगातार गोल गरेका थिए ।
इरानले बराबरी गोल गरेपनि त्यसले मान्यता पाएन । फ्रिकिकमा आएको बललाई सहिद इजातोलाहीले जाली चुमाएपनि रेफ्रीले भिएआरको सहयोगपछि त्यसलाई मान्यता नदिएका हुन् । इजातोलाहीले हेड गर्नुअघि सरदारले अजमोउनले बल ह्यान्ड गरेका थिए भने सहायक रेफ्रीले अफसाइडका लागि झण्डा उठाएको भिएआरमा देखिएको थियो ।

समूह चरणको आफ्नो पहिलो खेलमा बराबरी खेलेको स्पेनले दोस्रो खेलमा पहिलो जित दर्ता गराएपछि विश्व कपको नकआउट चरणमा पुग्ने सम्भावना बलियो बनाएको छ । स्पेनले पहिलो खेलमा पोर्चुगलसँग ३–३ गोलको बराबरी खेल्दै बराबरी गरेको थियो । यसअघि पोर्चुगलले मोरोक्कोलाई १–० ले हराएको थियो । अब दुबै टोलीको ४–४ अंक भएको छ ।

मोरोक्को प्रतियोगिताबाट बाहिरिएको छ । अब बाँकी तीन टोली पोर्चुगल, स्पेन र मोरोक्को मध्ये दुई टोली समूह बीबाट नकआउट चरणमा पुग्नेछन् । स्पेन र पोर्चुगलको समान ४ अंक र इरानको ३ अंक छ । अब समूहमा स्पेनले मोरोक्को र पोर्चुगलले इरानसँग प्रतिस्पर्धा गर्नेछ ।

प्रकाशित समय ०६:५१ बजे