प्रधानमन्त्री केपी शर्मा ओलीको चीन भ्रमणलाई चिनियाँ सञ्चारमाध्यमले उच्च महत्व दिएका छन् । खासगरी सरकारी सञ्चारमाध्यमले ओलीको आगमन र समन्वय प्रयासको प्रशंसा गरेको छ । समाचारहरुमा नेपालका प्रधानमन्त्री ओलीको भ्रमणलाई लिएर भारत निराश हुनुपर्ने कारण नरहेको टिप्पणी पनि गरिएको छ ।

चीनको सरकारी पत्रिका ग्लोबल टाइम्सले लेखेको छ, ‘नेपाल चीनसँगको सहकार्यमा आर्थिक सहयोग र आधारभूत ढाँचाको विकाससँग जोडिएका एजेण्डालाई टुंगोमा पुर्याउन चाहान्छ ।’
पत्रिकाले नेपालका प्रधानमन्त्री ओलीको यो प्रयासलाई लिएर भारत निराश हुन नपर्ने पनि भनेको छ । किनकि, चीनसँग नेपालको सहकार्य बढ्दैमा नेपालमा भारतको प्रभाव नघट्ने पत्रिकाको निष्कर्ष छ ।

अहिलेसम्म यी तीन मुलुकका नेतृत्वले भने त्रिपक्षीय सहकार्यको आवश्यकता औँल्याउँदै आएका छन् । ग्लोबल टाइम्समा संघाइ इन्स्टीच्युट फर इन्टरनेसनल स्टडीज सेन्टरका निर्देशक चाओ गेनछेङको भनाइ पनि समावेश गरिएको छ । उनले चीनका लागि नेपाल सधैं विशेष र महत्वपूर्ण रहँदै आएको बताएका छन् । ‘दुई देशको लामो सीमा र द्धिपक्षीय सहकार्य स्वायत्त तिब्बतसम्बन्धी स्थिरताका लागि महत्वपूर्ण छ,’ उनले भनेका छन्, ‘चीनको वान बेल्ट वान रोड प्रोजेक्टमा नेपाल एक महत्वपूर्ण देश भएको र आर्थिक विकासमा चीनले सघाओस् भन्ने नेपालको चाहाना चिनियाँ नेतृत्वले बुझेको पनि छ ।’

ओलीको भ्रमणलाई लिएर चिनियाँ विदेश मन्त्रालयका प्रवक्ता गेङ शुङले वान बेल्ट वान रोड परियोजनाको माध्यमबाट दुई देशबीच महत्वपूर्ण राजनीतिक साझेदारीको वातावरण बन्ने दाबी गरेका छन् । ‘राजनीतिक सहकार्यसँगै सांस्कृतिक आदान–प्रदान र दुई देशका नागरिकबीचको हेलमेलमार्फत पनि सम्बन्ध गहिरिनेछ,’ उनको भनाइ समाचारमा समेटिएको छ ।

संघाइ इन्स्टीच्युट फर इन्टरनेसनल स्टडीज सेन्टरका निर्देशक चाओले नेपाल र चीनको सम्बन्धलाई लिएर भारतमा बढाइ चढाइ हुनु गलत भएको बताएका छन् । ग्लोबल टाइम्सको समाचारमा उनले भनेका छन्, ‘भारतले नाफा नोक्सानको समीकरणबाट बाहिर निस्कन जरुरी छ । नेपाल चीनसँग सहकार्य गर्न चाहान्छ । तर, उसको अर्थ व्यवस्था भारतसँग निर्भर छ ।’

भारतले चीनको महत्वकांक्षी परियोजना ‘वान बेल्ट वान रोड’को विरोध गर्दै आएको छ । तर, नेपालले यसमा चीनलाई साथ दिएको छ । त्यसैले पनि भारतले नेपाल–चीनबीच सम्भावित सहकार्यलाई टाउको दुखाइको विषय ठान्ने गरेको छ । तर, चिनियाँ सञ्चारमाध्यमले विभिन्न विश्लेषक र राजनीतिज्ञलाई उदृत गर्दै लेखेको छ, ‘चीन नेपालमा आफ्नो प्रभुत्व जमाउन नभएर छिमेकीको हैसियतमा नेपालको चाहानाअनुसार विकासमा सघाउन चाहान्छ ।

भारतसँगको निर्भरता कम गर्न ओलीले चीन तिब्बतसँग आफ्नो सडकको सञ्जाल फैलाउन चाहनुभएको पत्रिकामा उल्लेख गरिएको छ । चिनियाँ रेलवेको विस्तार हिमालयदेखि नेपालसम्म विस्तार गर्ने विषय पनि यसपटक गम्भीर रुपले छलफल हुने कुरा समाचारमा उल्लेख गरिएको छ ।

यसबीचमा नेपाल र चीनबीच विभिन्न ९ परियोजना निर्माणसम्बन्धी समझदारी पनि मच्चिएको छ । ओलीको चीन भ्रमणलाई चिनियाँ सञ्चारमाध्यमले सकारात्मक रुपमा लिएर समाचार प्रकाशन, प्रशारण गरेपनि भारतमा भने हंगामा मच्चिएको छ । भारतीय सञ्चारमाध्यमले ओली चीनतिर ढल्किएको, भारतलाई घाटाजस्ता समाचारहरु प्रकाशन तथा प्रशारण गरिरहेका छन् ।

प्रकाशित समय ०७:१२ बजे