चिनियाँ राष्ट्रपति सि जिनपिङसँग भेट्ने भ्रमण तालिकासहित प्रधानमन्त्री केपी ओली चीनमा रहेकै समयमा उत्तर कोरियाली सर्वाेच्च नेता किम जोङ उन चीन जाने भएका छन् । बेइजिङबाट विभिन्न अन्तर्राष्ट्रिय समाचार संस्थाहरुले दिएको जानकारीअनुसार किम बुधबार बेइजिङ पुग्नेछन् । प्रधानमन्त्री ओली मंगलबारदेखि चीनको भ्रमणमा छन् । त्यहाँ रहँदा प्रधानमन्त्री ओली र राष्ट्रपति सि बीच भेटवार्ता हुने कार्यक्रम छ ।
चिनियाँ टेलिभिजन सिसिटिभीले जनाएअनुसार मंगलबार चीन जान लागेका किम बुधबार बोइजिङ पुग्नेछन् । पछिल्लो समय किमको चीन यात्रा बाक्लिएको छ । यही जुन १२ मा अमेरिकी राष्ट्रपति डोनाल्ड ट्रम्पसँग सिंगापुरमा ‘ऐतिहासिक’ वार्ता गरेका किम त्यसको केही दिनपछि चीन जान लागेका हुन् । वार्ता हुनु केही समय पहिला पनि उनी चीन पुगेका थिए ।
किमले ग्रेट हल अफ पिपुल्समा सि सँगको भेटमा उत्तर कोरियामाथिको प्रतिबन्ध, शिखर वार्तामा कोरिया प्रायद्वीपमा परमाणु निःशस्त्रीकरणको विषयमा छलफल गर्ने अनुमान छ । उत्तर कोरिया चीनको सहयोगी राष्ट्र हो । त्यसैले किमको चीन भ्रमणलाई महत्वका साथ हेरिएको छ ।

प्रकाशित समय १५:३० बजे