सरकारले भागबन्डा मिलाउनकै लागि एउटा मन्त्रालय टुक्र्याएको छ । बिहीबार बसेको मन्त्रिपरिषद बैठकले सत्तासाझेदार दललाई खुसी पार्नका लागि कृषि, भूमि व्यवस्था तथा सहकारी मन्त्रालय फुटाएर कृषि विकास र भूमि व्यवस्था तथा सहकारी मन्त्रालय गठन गरेको हो ।

स्वास्थ्य तथा जनसंख्या राज्यमन्त्री पद्मा अर्याललाई मन्त्रीको जिम्मेवारी दिन प्रधानमन्त्री केपी शर्मा ओलीले मन्त्रालय फुटाएका हुन् । सत्तासाझेदार संघीय समाजवादी फोरम नेपालले पनि राज्यमन्त्री पद मागिरहेको छ । अर्याललाई फुलमन्त्री बनाएपछि मात्रै फोरमका लागि कोटा खाली हुनेछ ।

यसअघि फोरमबाट यादव स्वास्थ्यमन्त्री र मोहम्मद इस्तियाक राई सहरी विकासमन्त्री छन् । सरकारमा आउनुअघि सत्तारुढ नेकपा र फोरमबीच जम्मा तीन मन्त्री लिने–दिने सहमति भएको थियो । कृषि विकास, पशुपन्छी विकास, भूमिसुधार तथा व्यवस्था र सहकारी तथा गरिबी निवारण गरी चार मन्त्रालय गाभेर ओली सरकारले कृषि, भूमि व्यवस्था तथा सहकारी मन्त्रालय बनाएको थियो । तर, पुनः मन्त्रालय फुटाएपछि मन्त्रालयको संख्या २१ बाट २२ पुगेको छ ।

प्रकाशित समय २०:०२ बजे