नेपाल टेलिकमको जीएसएम तथा सीडीएमए पोस्टपेड मोबाइलमा अब अन्तर्राष्ट्रिय कलका लागि आईएसडी सुविधा सेवाग्राही आफैंले लिन सक्ने भएका छन् । टेलिकमले असार १ गतेदेखि सेवाग्राहीलाई यो सुविधा दिएको हो ।
आईएसडी सुविधा लिन जीएसएम मोबाइलका लागि ‘0000’ र सीडीएमए मोबाइलका लागि ‘1234’ डिफल्ट पिन नम्बर हुनेछ । जीएसएम मोबाइलमा आफ्नो पिन नम्बर प्रयोग गरी आईएसडी सेवा खोल्नका लागि सेवाग्राहीले #331*PIN# डायल गर्नुपर्नेछ भने सेवा बन्द गर्नका लागि *331*PIN# डायल गर्नुपर्नेछ । साथै आफ्नो आईएसडी सेवा खुला वा बन्द रहेको जानकारी लिनका लागि *#331# डायल गर्नु पर्नेछ ।

सेवाग्राहीले सुरक्षाका लागि डिफल्ड पिन नम्बर परिवर्तन गरी इच्छाअनुसारको पिन नम्बर राख्न सक्नेछन् । पिन नम्बर परिवर्तन गर्नका लागि **03*331*old_PIN*newPIN*newPIN# डायल गर्नुपर्नेछ ।

साथै सीडीएमए पोस्टपेड मोबाइलमा पिन नम्बर परिवर्तन गर्न *81 डायल गर्नुपर्नेछ । आईएसडी सेवा खोल्नका लागि सेवाग्राहीले *82 डायल गर्नुपर्नेछ भने सेवा बन्द गर्नका लागि *820 डायल गर्नुपर्नेछ ।

जीएसएम तथा सीडीएमए पोस्टपेड मोबाइलमा योभन्दा पहिले पनि आईएसडी सुविधा लिन सकिने व्यवस्था थियो । तर, त्यसका लागि कार्यालयमै सम्पर्क राख्नुपर्थ्यो । आफ्नै मोबाइलबाट नम्बर डायल गरी सो सुविधा लिन सक्ने भएपछि सेवाग्राहीलाई सहज हुने विश्वास रहेको टेलिकमका प्रवक्ता प्रतिभा वैद्यले जानकारी दिइन् ।

प्रकाशित समय १४:०३ बजे