राष्ट्रिय वाणिज्य बैकले काठमाडौं इन्स्टिच्युट अफ चाइल्ड हेल्थ (किओच)लाई भवन निर्माणको लागि ५० रुपैयाँ सहयोग गरेको छ । बैकका अध्यक्ष निर्मल अधिकारीले किओचका संस्थापक डा. भगवान कोइरालालाई बुधबार चेक हस्तान्तरण गरे ।

किओचले निर्माण गर्ने बाल अस्पतालको एक युनिटमा राष्ट्रिय वाणिज्य बैंकको नामकरण गर्नुपर्ने पनि सहमति भएको छ । अस्पतालको भवन करिब ६० करोडको लागतमा निर्माण हुन लागेको हो ।

मनसुन सकेलगत्तै सुरु गरी २ वर्षभित्र निर्माण सम्पन्न गर्ने लक्ष्य रहेको अध्यक्ष कोइरालाले बताए । ‘विभिन्न संघसंस्थाबाट संकलित १ करोड रुपैयाँ खातामा जम्मा भइसकेको छ । डेढ करोड रुपैयाँको लिखित प्रतिवद्धता आएको छ । कतिपयले मौखिक प्रतिवद्धता जनाउनु भएको छ । सबै जम्मा गर्दा ८ देखि १० करोड हुन्छ,’ उनले भने ।

काठमाडौंको बुढानिलकण्ठमा केन्द्रीय बाल अस्पतालको रुपमा निर्माण हुन लागेको यस अस्पताल सातै प्रदेशमा सञ्चालन हुने कोइरालाले बताए । बाल स्वास्थ्यको क्षेत्रमा काम गर्ने, तालिमप्राप्त दक्ष जनशक्ति तयार गर्ने तथा गुणस्तर वृद्वि गर्ने जस्ता उद्देश्य बाल अस्पतालले लिएको छ । अध्यक्ष कोइरालाले अस्पताल मुनाफारहित कम्पनीको रुपमा सञ्चालन हुने बताए ।

२०२२ मा स्थापना भएको राष्ट्रिय वाणिज्य बैंक आजसम्म आइपुग्दा विभिन्न आरोह-अवरोह पार गर्दै आएको अध्यक्ष अधिकारीले बताए । ‘सुरुमा एकल बजार थियो, प्रतिस्पर्धा थिएन । अर्थतन्त्र विकाससंगै बजारमा नयाँनयाँ बैंक तथा वित्तीय संस्थाहरु खुले । एकातिर प्रतिस्पर्धा बढ्यो । अर्कोतिर सरकारको लोककल्याणकारी काम गर्नुपर्ने,’ उनले भने ।

बैकिङ क्षेत्रबाहेक सामाजिक कार्य गर्दै आइरहेको बैंकले आगामी दिनमा पनि सहयोग जारी राख्ने अध्यक्ष कोइरालाले प्रतिवद्वता व्यक्त गरे ।

प्रकाशित समय १८:३१ बजे