सरकारले अत्यावश्यक सेवाअन्तर्गत राखेको बैंकका कर्मचारीलाई प्रहरीले कार्यालय जान रोक लगाएपछि नेपाल बैंकर संघले आज मुख्य कार्यालयसहित सबै शाखा बन्द गरेको छ । बैंकका कर्मचारीलाई सडकमा अवरोध गरेपछि संघले उपत्यकाका सबै कार्यालय बन्द गर्ने निर्णय गरेको हो ।

बैंकका कर्मचारी जोखिम मोलेर कार्यालय जान चाहे पनि प्रहरीले अवरोध गरेका कारण शाखा खोल्न नसकिएको बैंकर एसोसिएसनले जनाएको छ । बैंकर्स एसोसिएसनका अध्यक्ष भुवन दाहालले सरकारले बैंकिङ सेवालाई अत्यावश्यक सेवाअन्तर्गत राखे पनि बाटोमा कर्मचारीलाई प्रहरीले अवरोध गरेर ह्युमिलेट गरेको बताए । ‘यस्तोमा बैंकका शाखा खोल्न सम्भव भएन, आज सबै शाखा बन्द रहनेछन्,’ उनले भने ।

नेपाल राष्ट्र बैंक, जिल्ला प्रशासन कार्यालयलगायतका सरोकारवाला निकायसँग समन्वय गरेर बैंकहरूले कर्मचारीलाई कार्यालयमा बोलाएको बताएका थिए । कार्यालयबाट बोलाइएपछि गएका बैंकका कर्मचारी एक घण्टाभन्दा बढी समय सडकमै रोकिएका थिए । लोकन्थलीबाट बानेश्वरमा रहेको कार्यालय जाँदै गरेका एनएमबी बैंकका एक कर्मचारीले कर्मचारीले कोटेश्वरमा एक घण्टाभन्दा बढी रोकिनुपरेको बताए ।

‘हामी ९ बजे नै कोटेश्वर पुगेका थियौँ,’ उनले भने, ‘प्रहरीले कोटेश्वरमा एक घण्टाभन्दा रोकेर राख्यो, कोटेश्वर ट्राफिक कार्यालयअगाडि करिब तीन सय जना रोकिएका थिए, तीमध्ये ९० प्रतिशत त बैंककै कर्मचारी थिए ।’ प्रहरीले आज जानुस् तर भोलिदेखि मिल्दैन भनेको उनले बताए ।

राष्ट्र बैंकले पनि यसलाई गम्भीरतापूर्व लिएको जनाएको छ । राष्ट्र बैंकका प्रवक्ता गुणाकर भट्टले तत्काल छलफल गरी निष्कर्ष निकालिने बताए ।

माथिल्लो निकायसँगको समन्वयको अभावमा बैंकका कर्मचारीलाई प्रहरीले रोकेको पाइएको छ । कालिमाटी क्षेत्रमा भने कार्ड देखाएपछि प्रहरीले जान दिएको बैंकका एक कर्मचारीले टेलिफोनमा बताए । जसोतसो कार्यालय पुगेका बैंकका कर्मचारी पनि अहिले घर फर्किसकेका छन् ।

कोरोना संक्रमण तीव्र गतिमा फैलिँदै नियन्त्रणबाहिर गएपछि सरकारले मंगलबार उपत्यकाका तीन जिल्ला काठमाडौँ, भक्तपुर र ललितपुरमा भदौ ३ गते राति १२ बजेदेखि लागू हुने गरी निधेषाज्ञा लगाएको छ । भदौ १० गतेसम्मका लागि निशेषाज्ञा लगाइएकोमा अत्यावश्यक सेवामा भने कुनै अवरोध नहुने उल्लेख गरिएको थियो ।

प्रकाशित समय १२:०० बजे