महालक्ष्मी विकास बैंकले आफ्ना संस्थागत ग्राहकका निम्ति बैंक खाताबाटै डिजिटल भुक्तानी गर्न सकिने गरी कर्पोरेट पे प्रणाली सुरु गर्न नेपाल क्लियरिङ हाउससँग सम्झौता गरेको छ । बैंकले व्यावसायिक ग्राहकलाई प्रदान गर्ने उक्त डिजिटल प्ल्याट्फर्ममार्फत बैंकमा नगई आफैँले रकमान्तर, तलब भुक्तानी, भेन्डर पेमेन्ट, सरकारी राजस्व भुक्तानीलगायतका विभिन्न व्यावसायिक भुक्तानी खाताबाटै सजिलै गर्न सक्नेछन् । उक्त प्रणालीमार्फत कनेक्टआइपीएस अथवा एनसीएलएल–आइपीएसमा रियल–टाइम वा नन–रियलटाइममा भुक्तानी कारोबार गर्न सकिने कम्पनीले जनाएको छ ।

कर्पोरेट पेमा आबद्ध हुनका लागि ग्राहकले बैंकमा सम्पर्क गरी स्वीकृतिलगायतका आवश्यक प्रक्रिया पूरा गरेर बैंकबाट सो सेवा प्राप्त गर्न सक्नेछन् । यसपश्चात प्रयोगकर्ता आफैँले तोकिएको सीमा कारोबारभित्र कुनै पनि भुक्तानी बैंकको प्रत्यक्ष संलग्नताबिना गर्न सक्छन् । सीमाभन्दा बढिको कारोबार गर्न बैंकको थप जाँचपश्चात प्रोसेस हुने व्यवस्था छ ।

यस प्रणालीमा पहुँच पाउन मल्टी–लायर अथेन्टिकेसनको सुरक्षित व्यवस्था गरिएको छ । त्यसैले कुनै पनि कारोबार प्रविष्ट र एपु्रभ गर्न ग्राहक आफैँले निर्धारण गरेको आधिकारिक प्रयोगकर्ताले मात्र गर्न पाउने गरी यो प्रणालीमा सुरक्षाको व्यवस्था मिलाइएको छ । ग्राहकले आवश्यकताअनुरुप यो प्रणालीमा एकभन्दा बढी बैंक खाता पनि लिङ्क गरी कारोबार गर्न सक्नेछन् ।

सम्झौता पत्रमा महालक्ष्मी विकास बैंकका कामु प्रमुख कार्यकारी अधिकृत सागर शर्मा र नेपाल क्लियरिङ हाउसका प्रमुख कार्यकारी अधिकृत नीलेशमानसिंह प्रधानले हस्ताक्षर गरेका छन् ।

प्रकाशित समय १३:१५ बजे