सरकारले देशका ७७ वटा परियोजनाका लागि अन्तर्राष्ट्रिय लगानी आह्वान गर्ने भएको छ । चैत १५ र १६ गते हुने अन्तर्राष्ट्रिय लगानी सम्मेलनमा सरकारको तर्फबाट ५० र निजी क्षेत्रका तर्फबाट २७ वटा आयोजना अघि सारिने भएको हो । बुधबार अर्थ मन्त्रालयमा आयोजित पत्रकार सम्मेलनमा अर्थमन्त्री डा. युवराज खतिवडाले लगानीकर्तालाई लगानीको सहज बाताबरण बनाउन ऐन, नियमावली, कार्यविधि बनाउने काम भइरहेको बताए ।

उनले नेपालको कर प्रणाली वैज्ञानिक रहेको र यसमा कुनै समस्या नरहेको दाबी पनि गरे । ‘सम्मेलनमा दर्जन बढी आयोजनामा सम्झौता गर्ने तयारी छ,’ उनले भने ।

पत्रकार सम्मेलनमा नेपाल उद्योग वाणिज्य महासंघकी अध्यक्ष भवानी राणाले अन्तर्राष्ट्रिय लगानी भित्र्याउन लगानी सम्मेलन महत्वपूर्ण हुने विश्वास व्यक्त गरिन् । नेपालमा अहिले लगानी गर्न उपयुक्त वातावरण बनेको दाबी गर्दै उनले भनिन्, ‘अहिलेको सरकार पनि लगानीमैत्री देखिएको छ ।’

नेपाल चेम्बर अफ कमर्शका अध्यक्ष राजेशकाजी श्रेष्ठले लगानीका लागि कानुनी झमेलाहरु कम हुँदै गएको बताए । उद्योग परिसंघका अध्यक्ष हरीभक्त शर्माले विदेशी लगानी भित्र्याउने सरकारले गरेका नीतिगत सुधारकै कारण यसपटकको सम्मेलन फलदायी हुने विश्वास व्यक्त गरे ।

तस्बिर : सुनिल प्रधान

प्रकाशित समय १२:१८ बजे