नेपाल देशको अर्थतन्त्रको तुलनामा सर्वाधिक धेरै रेमिट्यान्स भित्र्याउने देशहरूमध्ये पाँचौ स्थानमा परेको छ । विश्व बैंकद्वारा सार्वजनिक गरिएको रेमिट्यान्ससम्बन्धी प्रतिवेदन–२०१९ अनुसार सन् २०१८ मा नेपालले आफ्नो कुल गार्हस्थ्य उत्पादन (जीडीपी)को २८ प्रतिशत रेमिट्यान्स भित्र्याएको छ ।
बैंकका अनुसार गत वर्ष नेपालले ८ अर्ब १० करोड अमेरिकी डलर रेमिट्यान्स भित्र्याएको छ । नेपाली पैसामा परिणत गर्दा याे झन्डै ८ खर्ब ९० अर्ब रूपैयाँ हुन्छ । यो हालसम्मकै उच्च रेमिट्यान्स प्राप्ति हो ।  सन् २०१७ को तुलनामा २४ प्रतिशतले रेमिट्यान्स बढेको बैंकको प्रतिवेदनमा उल्लेख गरिएको छ । सन् २०१७ मा नेपालले ६ अर्ब ९२ करोड रेमिट्यान्स भित्र्याएको थियो ।
जीडीपीका आधारमा सर्वाधिक धेरै रेमिट्यान्स भित्र्याउने देशहरूमा टोंगा, दोस्रो स्थानमा कीर्गिज रिपब्लिक, तेस्रो स्थानमा ताजिकिस्तान, चौथौ स्थानमा हैटी र पाँचौ स्थानमा नेपाल रहेका छन् ।
रकमको आधारमा गत वर्ष भारत विश्वकै सर्वाधिक रेमिट्यान्स भित्र्याउने देश बनेको छ । गत वर्ष भारतले ७८.७ अर्ब अमेरिकी डलर रेमिट्यान्स भित्र्यायो भने दोस्रो स्थानमा रहेको चीनले ६७ अर्ब अमेरिकी डलर रेमिट्यान्स भित्र्याएको छ । भारतको केरलामा गएको बाढीपछि विदेशमा रहेका आप्रवासी कामदारहरूले आफ्नो घरको सहयोगका लागि रकम बढी पठाउँदा भारतमा रेमिट्यान्स बढेको विश्व बैंकको ठहर छ ।
दक्षिण एसियाली मुलुकहरूमध्ये भारतपछि पाकिस्तान छ, उसले २१ अर्ब अमेरिकी डलर भित्र्याएको छ भने बंगलादेशले १५ अर्ब अमेरिकी डलर रेमिट्यान्स भित्र्याएको छ । ती दुवै देशको मुख्य रेमिट्यान्सका स्रोत मुलुकका रुपमा रहेको साउदी अरबमा परेको मन्दीको असरले रेट्यिान्सको वृद्धिदर पनि औसत रहेको जनाइएको छ ।

प्रकाशित समय १२:३७ बजे