अर्थमन्त्री विष्णुप्रसाद पौडेलले चालू आर्थिक वर्षको बजेट वक्तव्यमा उल्लिखित राजस्व संकलनको लक्ष्य पूरा गर्ने गरी काम गर्न निर्देशन दिएका छन् । अर्थ मन्त्रालयका सचिवहरु,  आन्तरिक राजस्व विभाग र भन्सार विभागका महानिर्देशक, भन्सार तथा आन्तरिक राजस्व कार्यालयका प्रमुखहरुलगायतलाई मन्त्रालयमा बोलाएर अर्थमन्त्री पौडेलले कोभिड–१९ ले सिर्जना गरेका चुनौती सामना गर्दै राजस्व संकलनको लक्ष्य पूरा गर्न कुनै सम्झौता नगरिने बताएका हुन् ।

नियतवश त्रुटी गर्ने, कमजोरी गर्ने र असल मनसायबाट विचलित हुने कर्मचारीलगायत जो कोहीलाई पनि नछाडिने पनि स्पष्ट पारे । ‘डर, त्रास सिर्जना गरेर कर्मचारीलाई काममा लगाइँदैन,’ अर्थमन्त्रीले भने, ‘योग्यता र क्षमताको कदरसहित काम गर्ने अनुकूल परिस्थिति सिर्जना गरेर परिणाम निकाल्ने सरकारको उद्देश्य हो ।’

कठिनाइ र समस्या समाधान गर्नुपर्ने ठाउँमा मन्त्रालयले सहयोग, सहजीकरण र प्रोत्साहन गर्छ र लक्ष्य पूरा भए सम्मान गर्छ तर पूरा नभए कर्मचारी दण्डित हुनुपर्ने उनको स्पष्टोक्ति छ । अर्थमन्त्री पौडेलले कोभिडका कारण ‘ब्याक गेयर’ लगाएर राजस्वको लक्ष्य निर्धारण गरिएको भन्दै चालू आर्थिक वर्ष सकिँदा धेरैलाई सम्मान गर्ने वातावरण बनाउन अनुरोध गरे । उनले इमानदार र सक्रिय भएर लाग्न पनि निर्देशन दिए ।

अर्थमन्त्री पौडेलले समस्या र समाधानका बारेमा कर्मचारीहरु जानकार रहेको बताए । आफ्नै तहमा समाधान गर्न र आवश्यकता परेमात्र नेतृत्वलाई भन्न उनले आग्रह गरे । परिणाम निकाल्ने गरी काम गर्न कर्मचारीको व्यक्तित्व विकास र क्षमता अभिवृद्धिमा उनले विशेष जोड दिए । त्यसका लागि आपसी प्रतिस्पर्धामा काम गर्न उनको सुझाव छ । स्वास्थ्य सुरक्षाका सबै मापदण्ड पालना गरी कोभिड–१९ ले सिर्जना गरेका चुनौतीसँग जुध्दै अर्थतन्त्रलाई गतिशील बनाउन दृढताका साथ काम गर्न पनि उनले कर्मचारीलाई आग्रह गरे ।

भर्चुअल माध्यमबाट आयोजना गरिएको कार्यक्रममा अर्थसचिव शिशिरकुमार ढुंगाले राम्रो काम गर्नेलाई मन्त्रालयले संरक्षण तथा पुरस्कृत गर्ने र कार्य सम्पादन कमजोर भए मन्त्रालय कठोर बन्ने चेतावनी दिए । त्यस्तै राजस्व सचिव रामशरण पुडासैनीले चुहावट नियन्त्रणमा विशेष ध्यान दिन आग्रह गरे । कार्यक्रममा सयभन्दा बढी कर्मचारीको सहभागिता थियो ।

प्रकाशित समय ०७:४५ बजे