श्रम बजार सूचना प्रणालीको विकासका क्षेत्रमा काम गर्न नेपाल उद्योग वाणिज्य महासंघको नेतृत्वमा बृहत् परियोजना स्थापना गरिएको छ । महासंघको नेतृत्वमा साझेदार व्यावसायिक संस्थाहरु नेपाल उद्योग परिसंघ, घरेलु तथा साना उद्योग महासंघ, होटल संघ नेपाल र नेपाल निर्माण व्यवसायी महासंघ तथा ब्रिटिस काउन्सिलको सहयोगमा परियोजना स्थापना गरिएको हो । इम्प्लोयर लिड लेबल मार्केट सेक्रेटरियट नाम दिइएको परियोजनाको सोमबार काठमाडौँमा उद्घाटन गरिएको छ ।

परियोजनामार्फत अकुपेसनल क्लासिफिकेसन स्ट्यान्डर्डको विकास तथा श्रम बजार सूचना प्रणालीको विकास गर्ने जनाइएको छ । कृषि, भौतिक निर्माण र पर्यटनका क्षेत्रमा परियोजना कार्यान्वयन हुनेछ । सरकारबाट स्वीकृतिप्राप्त यो परियोजनाको अवधि १४ महिनाको हुनेछ भने परियोजनाको कुल बजेट १७ करोड ९० लाख ११ हजार ७३३ रुपैयाँ हुनेछ । महासंघको नेतृत्वमा साझेदार संस्थाको साझेदारीमा परियोजना कार्यान्वयनमा आउनेछ ।

मुलुकभित्र औद्योगिक व्यावसायिक क्षेत्रले श्रम बजारसम्बन्धी आवश्यक तथ्यांक एव जानकारीको अभावमा भोग्नुपरेको समस्यालाई परियोजनाले सम्बोधन गर्ने महासंघले जनाएको छ । त्यस्तै मुलुकको औद्योगिक विकासमा सहयोग पु-याउने, श्रम बजारसम्बन्धी सूचना प्रणालीलाई व्यवस्थित र भरपर्दो बनाउने, उद्योग प्रतिष्ठानहरुका लागि आवश्यक दक्ष जनशक्ति उपलब्ध गराउने, रोजगारी सिर्जना गर्ने र श्रम बजारसम्बन्धी तथ्यांक प्रणालीको विकासमा परियोजनाले काम गर्ने छ ।

कार्यक्रम महासंघ अध्यक्ष भवानी राणाले मुलुकभित्र उद्योग व्यवसायको मागका आधारमा श्रम बजारमा जनशक्ति तयार गर्ने लक्ष्यमा युरोपियन युनियन र ब्रिटिस काउन्सिलको सहयोग सराहनीय भएको बताइन् । त्यस्तै नेपालका लागि युरोपियन युनियनका राजदूत नोना डेपरेजले यो परियोजनाले नेपालको श्रम बजारका लागि आवश्यक दक्ष जनशक्ति उत्पादनमा महत्वपूर्ण सहयोग पु-याउने र नेपालको आर्थिक विकासमा आवश्यक दक्ष जनशक्तिको आपूर्तिमा सघाउने धारणा राखिन् ।

ब्रिटिस काउन्सिलका देशीय निर्देशक साहिदा म्याकडाउगल र टिभेट इम्प्लोयर पार्टनसिप विज्ञ जोन माउन्टफोर्डले परियोजना नेपालको व्यावसायिक क्षेत्रका नेतृत्वदायी संस्थाहरु एफएनसीसीआई, सीएनआई, एफक्यान, एफएनसीएसआई र हानबीचको सहकार्यको महत्वपूर्ण उदाहरण हुने बताए । दक्षता परियोजनाको साझेदारीमा ब्रिटिस काउन्सिलको सहयोगमा कार्यान्वयनमा आउने यो परियोजनाले दक्ष सीपयुक्त जनशक्ति उत्पादनमार्फत नेपालको आर्थिक विकास, लगानी आकर्षण र रोजगारी सिर्जनामा टेवा पुग्ने उनीहरुको विश्वास छ ।

कार्यक्रममा महासंघका वरिष्ठ उपाध्यक्ष शेखर गोल्छाले रोजगारीका लागि लाखौँ नेपाली बिदेसिनुपरेको अवस्थामा परियोजनाबाट राहत मिल्ने बताए । नेपालमा धेरै उद्योग भए पनि दक्ष जनशक्तिको अभावमा विदेशबाट कामदार ल्याउनुपर्ने र आफ्नो युवा जमात बिदेसिनुपर्ने बाध्यात्मक अवस्था कम गर्न परियोजनाले सहयोग गर्ने उनको भनाइ छ । महासंघका उपाध्यक्ष उमेशलाल श्रेष्ठले यो परियोजनाले नेपालको परिवेशमा रहेको जनशक्तिको माग र आपूर्तिलाई व्यवस्थापन हुने किसिमले तालिमको सञ्चालन गर्नुपर्ने धारणा राखे ।

कार्यक्रममा सहयोगी संस्थाहरु निर्माण व्यवसायी महासंघका अध्यक्ष रवि सिंह, होटल संघ नेपालका अध्यक्ष सृजना राणा, साना तथा घरेलु उद्योग महासंघका कार्यबाहक अध्यक्ष उमेश सिंह र नेपाल उद्योग परिसंघका उपाध्यक्ष वीरेन्द्रराज पाण्डेले परियोजना सफल बनाउन पूर्णरुपमा सहयोग गर्ने प्रतिबद्धता जनाए । महासंघका परियोजना समन्वय समितिका सदस्य सुमित केडिया र परियोजनाको टिम लिडर चन्द्रकान्त अधिकारीले परियोजनाको सुरुवात, परियोजनाको उद्देश्य, क्रियाकलाप, कार्यक्षेत्र, अपेक्षित परिणामलगायत विषयमा जानकारी गराए । कार्यक्रममा महासंघका उपाध्यक्ष किशोर प्रधान, कार्यकारिणी समिति सदस्यहरु, विभिन्न वस्तुगत संघका प्रतिनिधिहरुको उपस्थििति थियो ।

प्रकाशित समय ०८:१० बजे