‘क’ वर्गका कम्पनीहरूको कारोबार मापन गर्ने सेन्सेटिभ इन्डेक्स घटे पनि नेप्से परिसूचक मंगलबार ५ अंकले बढेको छ । बैंक, होटल, विकास बैंक, वित्त र म्युचुअल फन्डबाहेकका सबै समूह बढेपछि नेप्से परिसूचक ५.६८ अंकले बढेर १४०७.८९ अंकमा उक्लिएको हो ।

मंगलबार १८९ कम्पनीको ४१ लाख १४ हजार ५१२ कित्ता सेयर १ अर्ब २३ करोड ९० लाख रूपैयाँबराबरमा किनबेच भएको छ । यो रकम सोमबारको तुलनामा करिब १५ करोड बढी हो । सोमबार १८४ कम्पनीको ३५ लाख ९१ हजार ४८ कित्ता सेयर १ अर्ब ७ करोड ४९ लाख रूपैयाँमा किनबेच भएको थियो ।

मंगलबार सर्वाधिक नागरिक लगानी कोष, साधना लघुवित्त, पञ्चकन्या माई हाइड्रोपावर र युनियन हाइड्रोपावरको मूल्यमा सकारात्मक सर्किट लागेको छ । त्यस्तै नागरिक लगानी कोषको सर्वाधिक १६ करोड ६० लाख, नेपाल लाइफ इन्स्योरेन्सको ८ करोड ४२ लाख र नेको इन्स्योरेन्सको ७ करोड २५ लाख रूपैयाँबराबरको सेयर किनबेच भएको छ ।

नागरिक लगानी कोषले १ करोड ३५ लाख ९२ हजार ५९२ कित्ता हकप्रद सेयर जारी गर्न आरबिबी मर्चेन्ट बैंकिङलाई सेयर निष्कासन तथा बिक्री प्रबन्धक नियुक्त गरेपछि मूल्य चुलिएको हो । साधना लघुवित्तको सेयरमा सोमबार पनि सर्किट लागेको थियो ।

प्रकाशित समय १५:१९ बजे