सानिमा जनरल इन्स्योरेन्सले निष्कासन गर्न लागेको प्राथमिक सेयर (आईपीओ)मा असोज २१ गतेदेखि आवेदन दिन मिल्ने भएको छ । कम्पनीले असोज २१ गतेदेखि प्रतिसेयर अंकित मूल्य एक सय रुपैयाँको ३० लाख कित्ता अर्थात् ३० करोड रुपैयाँबराबरको आईपीओ बिक्री गर्न लागेको हो ।

कुल ३० लाख कित्ता साधारण सेयरमध्ये ५ प्रतिशत अर्थात् एक लाख ५० हजार कित्ता सामूहिक लगानी कोष र ४ प्रतिशत अर्थात् एक लाख २० हजार कित्ता कर्मचारीका लागि सुरक्षित गरिएको छ । बाँकी २७ लाख ३० हजार कित्ताका लागि सर्वसाधारणमा बिक्री गरिने कम्पनीले जनाएको छ ।

लगानीकर्ताले न्यूनतम १० कित्तादेखि अधिकतम १० हजार कित्तासम्मका लागि आवेदन दिन सक्नेछन् । आईपीओ बाँडफाँडपछि कम्पनीको चुक्ता पुँजी एक अर्ब रुपैयाँ पुग्नेछ ।

बिक्री प्रबन्धक एनआईसी एसिया क्यापिटलका अनुसार आईपीओको निष्कासन बन्द छिटोमा असोज २५ गते बैंकिङ समयपश्चात् हुनेछ । लेखा परीक्षण हुन बाँकी वित्तीय विवरणअनुसार गत आर्थिक वर्ष २०७६/२०७७ मा कम्पनीको प्रतिसेयर नेटवर्थ १०६.३५ रुपैयाँ र प्रतिसेयर आम्दानी २.६६ रुपैयाँ छ ।

प्रकाशित समय १७:२९ बजे