कर्णाली प्रदेश अस्पताल सुर्खेतमा कोरोना संक्रमित भएका सबै स्वाथ्यकर्मी निको भएका छन् । अस्तालमा कार्यरत नौ जना स्वास्थ्यकर्मीहरु आईतबार निको भएका हुन् ।

कोरोना संक्रमितको उपचारमा खटिएका दुई चिकित्सकसहित ९ जनामा कोरोना संक्रमण देखिएपछि गत असार ११ गतेदेखि अस्पतालको ओपीडी सेवासमेत बन्द गरिएका थिए । आइतबार सबै स्वास्थ्यकर्मीहरु निको भएपछि अस्पतालको सेवा सुचारु भएको कर्णाली प्रदेश अस्पताल सुर्खेतका निर्देशक डा. डम्बर खड्काले जानकारी दिए ।

हालसम्म कर्णालीमा कोरोनामुक्त हुनेको संख्या १ हजार २ सय ३१ पुगेको छ । सामाजिक विकास मन्त्रालयका अनुसार आइतबार मात्रै प्रदेशका विभिन्न अस्पतालबाट ३० जनाले कोरोना जितेका छन् ।

राष्ट्रिय जनस्वास्थ्य प्रयोगशाला काठमाडौंमा गरिएको पीसीआर परीक्षणमा १ र दैलेख अस्पतालमा गरिएको परीक्षणमा ८ जना गरी कर्णालीमा नयाँ संक्रमित संख्या ९ जना पुष्टि भएकोसमेत मन्त्रालयले जानकारी दिएको छ । मन्त्रालयका अनुसार कर्णाली प्रदेशभर आईसोलेसनमा रहेका कोरोना संक्रमितको संख्या २ सय ६१ रहेको छ ।

प्रकाशित समय १९:१३ बजे