नेपाल टेलिकमले हिमाली क्षेत्रका विकट बस्तीदेखि तराईका पिछडिएका जिल्लामा समेत प्राथमिकताका साथ सेवा विस्तार कार्य अघि बढाएको छ । कम्पनीले तराई/मधेस क्षेत्रमा मोबाइलको बीटीएस टावर निर्माण कार्यलाई तीव्रता दिएको हो ।

चालू आर्थिक वर्षमा मात्रै कम्पनीले तराईका १७ जिल्लामा २६० वटा बीटीएस टावर निर्माण गरी सञ्चालनमा ल्याएको छ । तराई क्षेत्रका मोरङ, सुनसरी, झापा, चितवन, सप्तरी, पर्सा, सर्लाही, धनुषा, बारा, रौतहट, सिराहा, कञ्चनपुर, बर्दिया, दाङ, कैलाली, महोत्तरीलगायत जिल्लामा कम्पनीले ती बीटीएस सञ्चालनमा ल्याएको हो ।

तराईका अधिकांश जिल्लामा कम्पनीका सेवा उपलब्ध भए पनि दुर्गम र कम जनघनत्व भएका कतिपय बस्तीमा सेवाको पहुँच स्थापित भएको थिएन । बीटीएस थप गरेपछि तराईका ग्रामीण भेगमा पनि मोबाइल र इन्टरनेट सेवा सहज रुपले उपलब्ध भएको कम्पनीले जनाएको छ । कम्पनीले टुजी र थ्रीजी बीटीएस स्थापना गरी सेवा उपलब्ध गराएको छ ।

नेपाल टेलिकमको एक करोड जीएसएम आयोजना अन्तर्गत ‘प्याकेज ए’ को कार्य लगभग सम्पन्न हुने क्रममा छ । प्याकेज ए को ५२ लाख क्षमताको नेटवर्क विस्तार योजनाअन्तर्गत काठमाडौं उपत्यकाबाहेक विभिन्न प्रदेशमा बीटीएस टावर स्थापना गर्ने कार्य जारी छ । कम्पनीको एक करोड जीएसएम आयोजनाका दुई प्याकेजमध्ये प्याकेज बी अन्तर्गत काठमाडौं उपत्यका तथा गण्डकी प्रदेशमा ४८ लाख क्षमताको नेटवर्क विस्तार कार्य पहिले नै शतप्रतिशत सम्पन्न भइसकेको छ ।

मुलुकभर गुणस्तरीय अत्याधुनिक दूरसञ्चार सेवा उपलब्ध गराउने लक्ष्यसहित चालू आर्थिक वर्षभित्र थप स्थानमा बीटीएस टावर निर्माण गरी सेवा विस्तार गर्ने लक्ष्यका साथ तीव्र रुपमा कार्य भइरहेको कम्पनीले जनाएको छ । मुलुकका सातै प्रदेशमा फोरजी/एलटीई सेवा विस्तार गर्ने कार्य पनि दु्रत गतिका साथ भइरहेको छ । अत्याधुनिक प्रविधि उपयोग गर्दै जीएसएम विस्तारको कार्यलाई थप चुस्त पार्ने लक्ष्य टेलिकमको रहेको जारी विज्ञप्तिमा उल्लेख छ ।

प्रकाशित समय १७:०७ बजे