पाँचथरको याङवरक गाउँपालिका–२ का पहिराबाट विस्थापित परिवारको स्थायी पुनःस्थापनाका लागि एकीकृत बस्ती निर्माण प्रक्रिया सुरु भएको छ ।

गत असार १० गते गएको पहिराबाट विस्थापित भएका याङवरक गाउँपालिका–२ चिङ्मा र सेपी बस्तीमा १७ परिवारका लागि एकीकृत बस्ती निर्माण गरिने भएको हो । याङवरक गाउँपालिकाका अध्यक्ष लेखनाथ घिमिरेले संघीय र प्रदेश सरकारसँग समन्वय गरी एकीकृत बस्ती निर्माण कार्य चाँडै थालनी हुने जानकारी दिए ।

एकीकृत बस्ती निर्माणका लागि गाउँपालिका–१ का वडाध्यक्ष मोहनकुमार ढुंगेलको संयोजकत्वमा जग्गा खोजी समिति बनाइएको छ । उक्त समितिले खोजी गरी सिफारिस गरेकामध्ये उपयुक्त स्थानमा एकीकृत बस्ती निर्माण कार्य सुरु हुने गाउँपालिका अध्यक्ष घिमिरेले जानकारी दिए ।

जग्गा खोजी समितिले गाउँपालिका–१ को च्याङथापु बजारको ठीक माथि रहेको साँगाडाँडा वा वडा नं २ को नारायणी मावि बेतेनीको माथिल्लो पट्टि रहेको खाली स्थानमा एकीकृत बस्ती निर्माणका लागि जग्गा लिन पहल थालेको छ ।

समितिका संयोजक ढुंगेलले बतेनीमा उपयुक्त जग्गा भेटिएको र जग्गाधनीसँग कुराकानी भइरहेको जानकारी दिए । आधा जग्गा चलनचल्तीको मूल्यमा खरिद गर्ने र बाँकी जग्गा दान माग्ने प्रस्ताव अघि बढाएको वडाध्यक्ष ढुंगेलले जनाए । यहाँ बस्ती बसाउन सकियो भने चिङ्मामा जग्गा हुनेहरुलाई खेती लगाउनसमेत नजिक पर्ने उनको तर्क छ ।

गाउँपालिका अध्यक्ष घिमिरेले बतेनीमा १३ रोपनी जग्गा भेटिएको र सोही जग्गामा आकर्षक एकीकृत बस्ती निर्माणको प्रयत्न थालिएको बताए । “जग्गाको प्रबन्ध गरेर प्रदेश र संघीय सरकारलाई एकीकृत बस्ती निर्माणका लागि सहयोग गर्न आग्रह गर्छौं,” अध्यक्ष घिमिरेले भने, “चाँडै एकीकृत बस्ती निर्माण कार्य सुरु हुन्छ ।” पहिराबाट विस्थापित परिवारले संघीय सरकार र प्रदेश सरकारको ध्यानाकर्षणका लागि प्रजिअमार्फत पुनःस्थापनाको मागसमेत गरिसकेका छन् ।

पहिराका कारण विस्थापित साबिक फलैँचा गाविस चिङ्मा र सेपी बस्तीका १७ परिवारका ४१ जना अहिले अस्थायी टहरामा दैनिकी गुजारिरहेका छन् । गत असार १० गते राति गएको पहिराका कारण घरमा बस्न सक्ने अवस्था नभएपछि उनीहरु चिङ्मा बस्तीभन्दा माथि जंगलको बीचमा रहेको समथर ठाउँमा त्रिपालमुनि बसोबास गर्दै आएका छन् ।

जिल्लाकै दुर्गम मानिएको यो बस्तीमा जताततै पहिरो गएपछि स्थानीयले घर छोडेका थिए । विस्थापित भई टहरामा बस्दै आएका चन्द्रबहादुर राईले बस्तीमा फर्कन सक्ने अवस्था नरहेकाले तत्काल वैकल्पिक व्यवस्था गर्न आफूहरुले माग गर्दै आएको बताए ।

उक्त स्थानमा बसिरहन समस्या रहेको तर तत्कालै अन्यत्र सार्न सकिने अवस्थासमेत नहुँदा आफूहरुले स्थानीयवासीलाई आश्वस्त पार्नसमेत नसकेको याङवरक गाउँपालिका–२ का वडा सदस्य प्रेमकुमार राईको भनाइ छ । “तत्कालै अन्यत्र सार्न सकिने अवस्था छैन । यहाँ रहिरहँदा झनै समस्या आउँछ । हिँउद लाग्दै छ । चिसो बढ्दै छ,” राईले भने, “त्रिपालमुनि बच्चा र वृद्धवृद्धालाई राख्दा अझै समस्या बढ्ला भन्ने पीर छ ।” (रासस)

प्रकाशित समय १३:२९ बजे