प्रहरीले पक्राउ गरी थुनामा राखेका पूर्वमन्त्री तथा नेत्रविक्रम चन्द ‘विप्लव’ नेतृत्वको नेकपाका प्रवक्ता खड्गबहादुर विश्वकर्मा ‘प्रकाण्ड’लाई गैरकानुनी थुनामा राखिएको भन्दै सर्वाेच्चमा रिट दायर भएको छ । विश्वकर्माका छोरा नरेन्द्रबहादुर सिंह विश्वकर्माले आफ्ना बाबुलाई गैर कानुनी रुपमा थुनामा राखिएको दावीसहित सर्वाेच्चमा रिट दायर गरेका हुन् ।

पार्टी कामको सिलसिलामा हेटौंडा गएका विश्वकर्मालाई काठमाडौं फर्कदै गर्दा प्रहरीले टौदहबाट नियन्त्रणमा लिएको थियो । चन्दा असुलीको आरोपमा पक्राउ परेका विश्वकर्मालाई जिल्ला अदालत काठमाडौंले पहिलो पटक ५ दिन र दोस्रोपटक ३ दिन थुनामा राखेर अनुसन्धान गर्न प्रहरीलाई म्याद दिइसकेको छ ।

नरेन्द्रबहादुरले आफ्ना बाबु, हरिशचन्द्र आचार्य र मनबहादुर श्रेष्ठलाई गैरकानुनी रुपमा थुनामा राखेको भन्दै सर्वाेच्चमा बन्दी प्रतक्षीकरणको रिट दायर गरेका हुन् ।

उनले गृह मन्त्रालय, गृहमन्त्री रामबहादुर थापा बादल, काठमाडौं जिल्ला अदालत, प्रहरी प्रधान कार्यालय र महानगरीय प्रहरी परिसर काठमाडौंलाई विपक्षी बनाई रिट दायर गरेका छन् ।

विकले रिटमा विना पूर्व जानकारी, विना पूर्जी पक्राउ गरी राजनीतिक आस्थाका अधारमा चन्दा सम्बन्धी झुट्टा मुद्दा लगाइएको रिटमा उल्लेख गरेका छन् । उनले मुद्दा लगाउनुपर्ने पर्याप्त आधार र कारण नभएकाले रिहाई गर्न माग गरेका छन् ।

प्रकाशित समय १८:२५ बजे