कर्णाली प्रदेशको राजधानी वीरेन्द्रनगर सुर्खेतमा पहिलो पटक राउटेले संविधान दिवस मनाएका छन् । बुधबार उनीहरुले खुलेरै संविधान दिवसको गुणगान गरे ।

विगतमा आफ्नै रीतिथितिमा तल्लीन हुने र आफूलाई जंगलको राजा मान्ने उनीहरु यस वर्ष कर्णाली प्रदेश सरकारसँगै हातेमालो गर्दै दिवस समारोहमा सामेल भए । दिवसमा उनीहरुले पैसरु नाच देखाए, अरूलाई आकर्षित गरे, प्रदेश प्रमुखसहित मन्त्री र सरकारका उच्च अधिकारीहरुलाई समेत मनोरञ्जन दिए ।

जंगलको बास छोडेर दैलेखेको गुराँस गाउँपालिका–८ झ्याजेस्थित बस्दै आएका राउटे दक्षिण एसियाको लोपोन्मुख जातिका रुपमा मानिन्छ । पछिल्लो समयको विकास र मानव चहलपहलका कारण राउटे रहनसहन र संस्कार छोडेर आधुनिक संस्कृति अँगाल्न थालेका छन् । यसबारेमा भने राउटेका मुखिया वीरबहादुर शाहीले जंगलमा आफ्नो सिकार सकिएकाले मान्छेको नजीक जान बाध्य भएको बताए ।

‘मान्छेले जुंगल मास्या (फँडानी गरे) । हाम्मो बास उठाया । सिकार नेठ्या (सके) । जंगलमा गुना बाँदर सकिदा मेरा जन्ता भोकै भया,’ मुखिया शाहीले दुःखेसो पोखे, ‘हामी हाम्मै संस्कारमा रमाउन चाहान्छौं ।’ मुखिया शाहीले भने, ‘सरकारका ठूला मान्छेसँग संविधान दिवस मनाउन पाउँदा खुशी लाग्याछ । यहाँका जुन्तासँग दिवस मनाउन आया हौं ।’

सफा कपडा लगाएको, पढेको, चिल्लो र फुर्तिलो दुनियाँभन्दा आफ्नो पहिचान माथि रहेको उनले दाबी गरे । राउटे संस्कार, पहिचान र रहनसहन फेरबदल हुनुले अस्तित्व संकटमा पर्ने चिन्ता रहेको मुखिया शाहीको भनाइ थियो । सामाजिक समन्वय केन्द्र (सोसेक)ले उनीहरुलाई गुराँस गाउँपालिकासँगको समन्वयमा दिवसमा सहभागी गराएको थियो ।

दिवस समारोहमा कर्णाली प्रदेश प्रमुख दुर्गाकेशर खनालले राउटे, कुसुण्डा जातिको हितमा सरकारले काम गर्नुपर्नेमा जोड दिए । उनले गुराँस गाउँपालिका दैलेखले पछिल्लो समयमा राउटेलाई राज्यको मूल प्रवाहमा ल्याउन परिचयपत्र उपलब्ध गराएको भन्दै धन्यवादज्ञापन गरे ।

प्रदेश सरकारका कार्यवाहक मुख्यमन्त्री नरेश भण्डारीले जाति, भाषा र विविधतायुक्त भूगोलको कर्णाली प्रदेश विकासमा सरकार लागिपरेको बताए । ‘दक्षिण एसियाको लोपोन्मुख राउटे जाति र सडक मार्गविहिन टोपी खस्ने उकालोमा घण्टौं भारी बोक्ने मान्छे कर्णाली प्रदेशमा छन्,’ उनले भने, ‘तिनको न्यायका खातिर प्रदेश सरकार योजना बनाएर अघि बढिरहेको छ ।’

कार्यक्रममा प्रदेश उपसभामुख पुष्पा घर्ती, सामजिक विकासमन्त्री दल रावल, उद्योग पर्यटन, वन तथा वातावरणमन्त्री नन्दसिंह बुढा, प्रदेशसभा सदस्यहरु, न्यायलयका प्रमुख, सरकारी अधिकारी तथा सुरक्षा निकायका प्रमुख, नागरिक समाज र साहित्य कलालगायत विभिन्न क्षेत्रका व्यक्तित्व र नागरिक तथा समुदायको सहभागिता रहेको थियो ।

प्रकाशित समय २०:४८ बजे