पूर्वसांसद विश्वनाथप्रसाद (विपी) यादव फेरि अर्को कीर्ते काण्डमा मुछिएका छन् । नक्कली उपभोक्ता समिति बनाएको आरोपमा उनलाई प्रहरीले बिहीबार पक्राउ गरेको छ । यादव सांसद रहेकै बेला रातो पासपोर्ट बेचेको काण्डमा मुछिएका थिए ।

उनले सप्तरीमा नक्कली उपभोक्ता समिति बनाएर खाता समेत खोलेको आरोपमा प्रहरीले पक्राउ गरेको बताएको छ । प्रदेश २ सरकारको योजना गाउँलेलाई थाहै नदिइ नक्कली उपभोक्ता समिति बनाएर उनले हत्याउने प्रयास गरेको प्रहरीले आरोप लगाएको छ ।

राष्ट्रिय जनता पार्टी (राजपा) नेपालको केन्द्रीय सदस्यसमेत रहेका बीपी यादवले २५ लाखको योजना ल्याउन कीर्ते गरेर उपभोक्ता समिति गठन गरेका थिए । नक्कली उपभोक्ता समिति बनाएर उनले प्रदेश २ को भौतिक पूर्वाधार विकास मन्त्रालयबाट योजना ल्याएका थिए । भौतिक पूर्वाधार विकास मन्त्रालयमा राजपाकै नेता जितेन्द्र सोनल मन्त्री छन् । यादवले मन्त्रालयबाट सप्तरीको अग्निसाइर कृष्णासवरण गाउँपालिका २ र ३ मा पर्ने सडक ग्राभेल गर्ने योजना ल्याएका थिए ।
उक्त योजना उपभोक्ता समिति गठन गरेर मात्र संचालन गर्न सकिने भएपछि गाउँपालिकाको नक्कली लेटर प्याडमा नक्कली समिति बनाएको पाइएको थियो । नक्कली उपभोक्ता समितिसँग राजविराजस्थित पूर्वाधार विकास कार्यालयले सडक ग्राभेल योजनाको सम्झौता भएको थियो । नक्कली समितिले बैंक खातासमेत खोलेर काम शुरु गरेपछि स्थानीय बासिन्दाले सोधखोज गरेका थिए । त्यसपछि यादवले नक्कली उपभोक्ता समिति बनाएको रहस्य खुलेको प्रहरीले जनाएको छ ।

प्रकाशित समय १८:४१ बजे