सांसद पुष्पा भुसालले प्रधानमन्त्री केपी शर्मा ओलीले विधिको शासनको ठाडो उल्लंघन गरी हुकुमी शैलीमा शासन गर्दै आउनुभएको आरोप लगाएकी छन् । प्रतिनिधिसभाको सोमबारको शून्य समयमा सांसद भुसालले कारागार ऐनको दफा ११ र २५ उल्लंघन गरी उपचारका क्रममा रहेका सांसद रेशम चौधरीको खुट्टामा लगाइएको नेल फुकाल्ने र नेल लगाउने कारागारका कर्मचारीलाई कारबाही गर्न ठाडो आदेश दिनु प्रधानमन्त्रीको हुकुमी शैली भएको तर्क गरिन् । कारगार ऐनको दफा ११ मा नेल लगाउन चिकित्सकको सुझाव लिनुपर्ने र दफा २५ मा जघन्य अपराध गर्नेलाई नेल लगाउनुपर्ने व्यवस्था छ ।

सांसद पूर्णकुमारी सुवेदीले राप्ती नदीमा पक्की बाँध निर्माण गर्न सरकारसँग माग गरिन् । उनले भारतीय पक्षले निर्माण गरेको लक्ष्मणपुर बाँधका कारण बाँकेका १० हजार बिघा जमिन डुबानमा परेको बताएन् ।

सांसद प्रेम सुवालले बाँकेको सिमानामा निर्माण गरिएको लक्ष्मणपुर बाँध तत्काल भत्काउन सरकारको ध्यानाकर्षण गराए । सांसद डिला संग्रौला, नवीना लामा, पार्वता डिसी चौधरी, पार्वतीकुमारी विसुङ्खेले राजधानीमा अज्ञात समूहले महिलामाथि सिरिन्ज आतंक मच्चाएको भन्दै तत्काल पक्राउ गर्न सरकारको ध्यानाकर्षण गए ।

सांसद दिलेन्द्रप्रसाद बडूले विप्लव समूहसँग तत्काल वार्ता सुरु गर्न माग गरे । सांसद नारायणप्रसाद खतिवडाले विर्ता उन्मूलन भए पनि नुवाकोटमा एक हजार ५५८ रोपनी जमिन खनजोत गर्ने चार हजार ९५७ व्यक्तिलाई तत्काल मोही कायम गर्न सरकारको ध्यानाकर्षण गराए ।

सांसद तेजुलाल चौधरी, देवप्रसाद गुरुङ, देवेन्द्र पौडेल र नारायणप्रसाद मरासनीले वर्षाका कारणले जनधनको क्षति पुगेकाले क्षतिपूर्ति तथा नदी नियन्त्रणको माग गरे ।

प्रकाशित समय १३:५३ बजे